Римде өтіп жатқан Гран-при турниріне біздің елден санаулы спортшы ғана қатысып жатыр. Олар – Руслан Жапаров (+ 87 келі), Смайыл Дүйсебай (87 келі) және Нұрлан Мырзабаев (80 келі). Соңғысы даянгке бүгін шықты. Нәтижелері әлі қорытындыланған (жарияланған) жоқ. Ал Смайыл 15-орынмен шектелсе, Руслан финалға шықты.
Жапаров әуелі Канада спортшысын айқын басымдықпен ұтты (27:10). Одан кейін Корея таэквондошысамен өткен шектен тыс шиеленісті жекпе-жекте (0:0) бағы жанып, келесі кезеңге өтті. Ширек финалда ресейлік Роман Кузнецовтан айласын асырды (10:9). Жартылай финалда британиялық Махама Чоны қиналмай ұтты (25:9).
Финалда Ресейдің тағы бір спортшысымен кездескен. Әрі жекпе-жектің аяқталуына 40 секунд қалғанда, Владислав Ларинді 7:1 есебімен ұтып та жатқан. Алайда қалған уақытта жеңісті уысынан шығарып алды (7:9). Сөйтіп, күміс жүлдемен шектелді. Лариннің 2019 жылғы әлем чемпионы және Еуропаның екі дүркін чемпионы екендігін айта кеткеніміз жөн болар.
Маруан Түсіп
