Қазақстандық теннисші Елена Рыбакина WTA рейтингінің үздік үштіктен бір саты төмендейді. Рыбакинаны үшінші орыннан 29 жастағы Джессика Пегула ығыстырады. Америкалық теннисші Вашингтонда (АҚШ) өткен WTA-500 турниріндегі өнерінің арқасында WTA рейтингінің үздік үштігіне қайта оралады. Дүйсенбі күні қауымдастық бұл туралы ресми түрде хабарлайды. Бүгінгі таңда қазақстандықтың 5 465 ұпайы, ал америкалық теннисшінің 5 480 ұпайы бар. Вашингтондағы турнирден кейін Пегуланың максималды ұпайы 5 675 болады. Нәтижесінде Елена бір саты төмендейді.
Бұған дейін Пегула Вашингтонда өткен турнирдің жартылай финалына шыққан болатын. Бірақ күтпеген жерден жеңіліс тапты. Пегула грекиялық Мария Саккаримен (WTA рейтингінде 9-шы) кездесуде фаворит саналды, бірақ оған үш сетте есе жіберді - 3:6, 6:4, 2:6.
Рыбакинаның Уимблдондағы өнерінен кейін әлі WTA турнирлеріне қатыспағанын айта кетейік. Қазіргі таңда ол Монреальда (Канада) өтетін WTA-1000 жарысына қатысуға дайындалуда. Елена осы турнирдің үшінші ракеткасы болып тіркелгендіктен бірінші айналымға қатыспай, жарысты 1/16 финалдан бастайды. Онда Рыбакина Дженнифер Брэди (АҚШ) - Елена Остапенко (Латвия) жұбының жеңімпазымен ойнайды. Турнирдің жүлде қоры 2 788 468 долларды құрайды. Қомақты жүлдеден бөлек канадалық турнирде жеңімпаз 900, финалист – 585, жартылай финалист – 350 рейтингтік ұпайға ие болады.
