"Сарыарқа" Құрлық Кубогындағы екінші кездесуін өте сенімді бастады. 8-ші минутта Эмиль Нұрғалиев пен Кирилл Кожевниковтың шығарған пасынан кейін Денис Федоров қарағандылықтарды алға шығарды. Жалпы "Сарыарқа" ойыншылары алғашқы кезеңді тартысты өткізді. Есеп ашылғаннан кейін бір-екі минут өткеннен соң қарағандылықтар басымдылығын еселей түсті. Ал кезең аяқталар тұста Степан Грымзин қатарынан екінші матчта гол соқты. Командалар 3:0 есебімен, үзіліске кетті.
Екінші кезеңде қазақстандық хоккейшілер белсенді өнер көрсетті деп айта алмаймыз. Шабуылдар болды. Бірақ "сары-қаралар" қарсылас қақпасына гол соға алмады. Кезеңнің соңында қонақтар ойыншылар саны жағынан басымдыққа ие болып, өз мүмкіндіктерін толық пайдаланды. Есеп 3:1.
Үшінші кезеңнің 15-минутында италиялықтар ойыншылар басымдығына қол жеткізді. 3-5 форматында ойнаған кезде Виктор Селиверстов өз қақпасына екінші голды жіберіп алды. Десе де, "Азиагоның" қуанышы ұзаққа бармай, Никита Аноховский дубль жасады.
Құрлықтық кубоктің екінші матчында 4:2 есебімен жеңіске қол жеткізген "Сарыарқа" финалға жолдама алды. Бүгін ел чемпиондары "Попрад" хоккей командасына қарсы турнирдегі ең маңызды ойынды өткізеді. Словакия құрамасымен кездесу Нұр-Сұлтан уақытымен 19:00-де басталады.
Ермұхамед Мәулен
