Сенаттың жалпы отырысында жаңа Салық кодексі бірінші оқылымды мақұлданды. Екінші оқылымға дайындау барысында құжатты Мәжіліске қайтару жөніндегі шешім қабылданды, деп хабарлайды inbusiness.kz сайты.
"Сенаттың Бас комитеті мен комитеттерінің ескертулері мен ұсыныстарын ескере отырып, Мәжіліс қабылдаған Кодекске мынадай негізгі бағыттар бойынша өзгерістер мен толықтырулар енгізу қажеттігі туындады. Шаруа немесе фермер қожалықтарының (бұдан әрі - ШФҚ) кірістері бойынша жеке табыс салығына (бұдан әрі – ЖТС) прогрессивті салық салуды енгізу. Бұған дейін Үкімет азаматтардың жиынтық табыстары бойынша 8500 АЕК-тен жоғары ЖТС бойынша және жалпыға бірдей белгіленген тәртіппен жұмыс істейтін дара кәсіпкердің (бұдан әрі – ДК) 230 000 АЕК-тен жоғары табыстары бойынша 15% мөлшерінде ЖТС бойынша прогрессивті салық салуды енгізу мәселесіне бастамашылық жасаған болатын.
Біркелкі тәсілді қолдану мақсатында және ДК сияқты ШФҚ кәсіпкерлер болып табылатындығын, бірақ экономикалық қызметтің өзге түрімен айналысатындығын ескере отырып, ШФҚ табыстарының ЖТС-на 15%-дық мөлшерлеме бойынша 230 000 АЕК-тен жоғары салық салуды көздеу ұсынылады. Бірақ қазіргі 70% жеңілдікті ескере отырып, ШФҚ бойынша ЖТС мөлшерлемесі 4,5% мөлшерінде болады", – делінген қорытынды құжатта.
Қазақстан қор биржасы (KASE) мен "Астана" халықаралық қаржы орталығының биржасы арасындағы төрелікті болдырмау мақсатында KASE-де бағалы қағаздардың айналысына байланысты азаматтардың табыстары бойынша дивидендтерді ЖТС-тан босату бойынша салықтық жеңілдік ұсынылады. Сондай-ақ төлем карточкаларына байланысты операцияларды қосылған құн салығынан босату бойынша жеңілдік көзделеді. Қазақстандық банктердің клиенттеріне қызмет көрсету бойынша халықаралық төлем жүйелерімен қиындықтарды болдырмау және карталармен төлем жасау кезінде транзакциялар құнының қымбаттауын болдырмау үшін қолданыстағы жеңілдікті сақтау қажет.
Бұдан басқа келесі өзгерістер қарастырылған:
- сән-салтанат заттарына салық салу бойынша жеке нормалар белгіленеді. Жеке тұлғалар ғана сән-салтанат заттарына акциз төлеушілер болады. Бұл ретте автомобильдер, кемелер және ұшу аппараттары сияқты сән-салтанат заттарына салық салу олардың импорты кезінде ғана емес, егер олардың құны шекті сомадан артық болса (автомобильдер үшін – 75 млн теңгеден астам, кемелер мен ұшу аппараттары үшін – 100 млн теңгеден астам), оларды ел ішінде сату кезінде де салық салынады;
- бейрезиденттер үшін мемлекеттік бағалы қағаздармен жасалатын айналымға байланысты кірістер бойынша қолданыстағы салықтық жеңілдіктерді сақтау ұсынылады. МБҚ нарығына шетелдік инвесторларды тарту инвесторлық базаны әртараптандыру және бюджет тапшылығын тұрақты қаржыландыру үшін негізгі бағыт болып табылады. Сондықтан МБҚ айналымдарынан бейрезиденттердің кірістеріне салық салуды енгізу капиталдың кетуіне әкелуі мүмкін;
- салық салу объектісіне, салық базасына, салық төлеушілердің (салық агенттерінің) санаттарын ұлғайтуға, шегерімнің немесе жеңілдіктердің күшін жоюға немесе азайтуға қатысты Салық кодексіне өзгерістер ағымдағы жылдың 1 шілдесінен кешіктірілмей қабылданатын және олар қабылданған жылдан кейінгі жылдың 1 қаңтарынан кейін қолданысқа енгізілетін толықтыру ұсынылған;
- салық төлеуші камералдық бақылау нәтижелері бойынша болжамды алшақтықтар туралы хабарламаны орындамаған жағдайда электрондық шот-фактураны тоқтата тұру көзделеді;
- жеке тұлға үшін азаматтық-құқықтық сипаттағы шарттар бойынша жеке тұлғалардың кірістерінен ұсталатын әлеуметтік аударымдар бойынша салықтық шегерімді көздеу ұсынылады;
- мүгедектігі бар адамдар болып табылатын жұмыскерлер саны кемінде 10 адамды құрайтын кәсіпорындарда тауарларды, жұмыстарды, көрсетілетін қызметтерді өткізу бойынша айналымдарды ҚҚС-тан босататын норма көзделеді;
- отандық мерзімді баспа басылымдарын өткізу бойынша айналымға 10% мөлшерінде ҚҚС мөлшерлемесі белгіленеді;
- қоршаған ортаға теріс әсер еткені үшін бірінші санаттағы тіршілікті қамтамасыз ету объектілерге қолданыстағы төлемақы мөлшерлемелерін сақтау ұсынылады;
- салық салу мақсатында шаруа немесе фермер қожалықтарына өтеусіз берілген мүліктің құны арнаулы салық режимін қолданатын салық төлеушінің табысы ретінде қаралмайтыны белгіленеді;
- халықаралық іскерлік операциялар және Қазақстан Республикасының аумағында жасалған және халықаралық іскерлік операциялармен тікелей өзара байланысты мәмілелер бойынша зияткерлік меншік объектілерінен түсетін кірістің "Трансферттік баға белгілеу туралы" Қазақстан Республикасының Заңы ескеріле отырып айқындалатыны көзделеді;
- әлеуметтік маңызы бар азық-түлік тауарларын өткізу бойынша айналымдарды ҚҚС салудан босату жөніндегі норманы алып тастау ұсынылады.
Кодекстің нормаларын өзара ұштастыратын, сондай-ақ заң техникасының ережелерімен байланысты өзгерістер енгізілді.
