"Қайраттың" жаңа шабуылшысы Штрели Мамба алматылық клубтың сапында алғашқы сұхбатында өзінің алған әсерлерімен бөлісіп, алға қойған мақсаттары туралы айтты.
- Штрели, "Қайратқа" қош келдіңіз! Сіз бұл клубты таңдау барысында неге басты назар аудардыңыз?
- Рахмет! Мен үшін шетелде тәжірибе жинау маңызды болды. "Қайрат" - дәстүрі мен тарихы бай клуб. Оның халықаралық деңгейде ойнауға мүмкіндігі бар. Клубта кез-келген ойыншыға кәсіби деңгейде жұмыс істеуге мүмкіндік беретін керемет инфрақұрылым жақсы дамыған.
- Алексей Шпилевскиймен болған алғашқы әңгімеңіз туралы айтып берсеңіз. Сіз онымен не туралы сөйлестіңіз?
- Мен бас бапкермен "Қайрат" клубының мақсаттары, ойын философиясы және Алматы қаласы туралы сөйлестім.
- Сізді командада қалай қарсы алды?
- Команда мені өте жақсы қабылдады, барлығы жарқын жүзді жігіттер екен.
- Сіз кешкі ас кезінде неміс тілінде рэп айттыңыз. Ән не туралы болды?
- Ән ешқашан бас тартпау, әрқашан алдына мақсат қою және сол мақсаттарға жету үшін қолдан келгеннің бәрін жасау туралы. Менің өмірдегі ұстанымым: "Ешқашан мүмкіндіктен бас тартпа, әрдайым жеңіске аш бол!"
- Соңғы сынақтың нәтижесі бойынша сіз командадағы ең жылдам ойыншы атандыңыз. Мұның сыры неде?
- Мен кішкентай кезімнен бастап өз командамдағы жылдам ойыншылардың бірі болдым. Менде өте жақсы генетикалық бейімділік бар және қысқа қашықтыққа жүгіру арқылы көп жылдар бойы жаттықтым.
- Сіздің маусымға арналған жеке мақсаттарыңыз қандай?
- Командаға көмектескім келеді және бұл үшін бар күш-жігерімді салуға дайынмын. Тамаша ойын көрсетуге тырысамын. Менің ойыным клубқа мүмкіндігінше өз пайдасын тигізсе деймін. Әр ойын сайын ойланып, көп жұмыс істесеңіз, соңында марапатқа ие боласыз.
Ермұхамед Мәулен
