Өнеркәсіп және құрылыс министрі Қанат Шарлапаев су тасқынынан зардап шеккен өңірлердегі жөндеу-қалпына келтіру жұмыстарының барысын баяндады, деп хабарлайды inbusiness.kz сайты.
"Су тасқыны салдарынан 18 005 жылжымайтын мүлік нысаны зардап шеккен. Олардың 17 295 объект бойынша сараптама нәтижесі бар. 2 245 нысанның құрылысын жүргізу, жылжымайтын мүлік нарығынан 5 235 үй мен пәтер сатып алу, 9 819 тұрғын үйді жөндеу жоспарланған. Бүгінгі таңда елімізде 1 828 үйдің құрылысы басталды, бұл жоспарланған көрсеткіштің 81%-ын құрайды. Бұл ретте БҚО мен Ақмола облыстарында құрылыс жұмысы мен жұмылдырудың төмен қарқыны байқалады. Ақтөбе облысы мен БҚО-да әлі күнге дейін 2 122 үй су астында қалып отыр. СҚО-да құрылыс қарқыны жақсы", - деді министр Үкімет отырысында.
Жылжымайтын мүлкі жарамсыз деп танылған қазақстандықтар үшін 1 943 нысан сатып алынды. 3 882 үйдің жөндеу жұмыстары жүргізіліп жатыр. Бүгінгі таңда 1 772 үйдің иелері төлем алды.
