"Тараз" футболшылары Қазақстан чемпионатының тоғызыншы туры аясында өткен матчта "Мақтааралды" жеңді. "Түркістан Аренада" өткен кездесу 1:0 есебімен аяқталды. 77-минутта Мақсат Әмірхановтың соққан голы матч тағдырын шешті. Осы жеңістің арқасында "Тараз" 17 ұпай жинап, турнирлік кестеде 1-орынға көтерілді. Ал 5 ұпайы бар "Мақтаарал" соңғы орында қалды.
Сондай-ақ "Ақсу" мен "Каспий" өзара мықтыны анықтады. Павлодардағы Орталық стадионда өткен матч 2:0 есебімен "Ақсудың" пайдасына аяқталды. Ойынның 9-минутында Али Гаджибеков алаң иелерін алға шығарды. Ал кездесу соңында Еркебұлан Тұңғышбаев командасының екінші голын соқты.
"Шахтер" Қазақстан Премьер-лигасының тоғызыншы турында "Тобылды" қабылдады. Қарағандыдағы "Шахтер" стадионында өткен кездесу 4:1 есебімен аяқталды. Ойынның 32-минутында Алекса Аманович өз айып алаңында қолмен ойнағаны үшін алаңнан қуылды. Нүктеге келген Тимур Досмағамбетов пенальтиді сәтті орындады. Екінші таймның басында Николай Ковталюк есепті еселеді. 61-минутта Досмағамбетов тағы да пенальтиден гол соқты. Ал 70-минутта қосалқы құрамнан шыққан Айбар Жақсылықов есепті қысқартты. 81-минутта алаңға шыққан Роман Мұртазаев бірнеше секундтан кейін ойынның нүктесін қойды.
Тоғызыншы турда "Ақтөбе" "Ақжайықты" 2:1 есебімен жеңді. Ойынның 10-минутында Ақжайық шабуылшысы Оралхан Өміртаев есеп ашты. 49-минутта Йоахим Адукор таразы басын теңестірді. Ал 73-минутта Сердер Сердеров жеңіс голын соқты.
Алматылық "Қайрат" Қазақстан Премьер-лигасының тоғызыншы турында "Қызыл-Жармен" кездесті. Матч Алматыдағы Орталық стадионда өтіп, 1:1 есебімен аяқталды. Ойынның небәрі алтыншы минутында "Қайраттың" капитаны Рикарду Алвеш қауіпті ойнағаны үшін қызыл қағаз алды. Бірінші тайм аяқталар тұста Сұлтанбек Астанов мергендік танытты. Ал 64-минутта Дарко Зорич қарсылас қақпасынан саңылау тапты. Осы матчтан кейін 13 ұпаймен "Қайрат" турнирлік кестеде 10-орынға, ал 7 ұпайы бар "Қызыл-Жар" 13-орынға жайғасты.
Ермұхамед Мәулен
