"Тау-кен Самұрық" ұлттық кен компаниясы еліміздің үш облысында геологиялық барлау жұмыстарын бастамақ. Акционерлік қоғам бұл шаруаны "Discovery Ventures Kazakhstan" ЖШС-мен бірлесіп жүргізбек.
Дәлірек айтсақ, қос компания Жамбыл, Қарағанды және Шығыс Қазақстан облыстарының аумағын барлап көрмек. Олар жобаны іске асыруға 6 жылды арнамақ. Бірінші кезеңдегі барлық геологиялық барлауды "Discovery Ventures Kazakhstan" ЖШС қаржыландырады.
Келісімшарттық учаскелердің жалпы ауданы шамамен 1 500 шаршы шақырымға тең. Операторлық келісімде алтын, мыс, мырыш және ілеспе металдарды барлау қарастырылған.
"Қазір отандық минералды шикізат базасының өндіріс қарқыны айтарлықтай төмендеуде. Бұл өте маңызды мәселеге айналып отыр. Қазақстанда орта мерзімді келешекте жаңа кен орындарының болмауы кен байыту саласының құлдырауына алып келуі мүмкін. Тәуекелдің жоғарылығына қарамастан, біз геологиялық барлау жобаларын бастау туралы шешім қабылдадық. Бұл әлемдік үрдіс. Көптеген ірі компаниялар қазір дәл осы жолмен жүріп келеді", – дейді "Тау-кен Самұрық" ұлттық тау-кен компаниясы" АҚ Басқарма төрағасы Қанат Құдайберген.
Компания өкілдерінің хабарлауынша, барлаудың алғашқы жылында тарихи деректерді жинау және түсіндірумен, геофизикалық зерттеулермен және геологиялық карталаумен айналыспақ. Бұдан бөлек лицензиялық аумақ бойынша ауқымды аэромагниттік түсірілім жүргізу жоспарлануда. Содан кейін геофизикалық зерттеулердің деректері кейінгі жылдарға қажетті геологиялық барлау жұмыстарының көлемін анықтау үшін жан-жақты талданатын болады.
Еске сала кетейік, "Discovery Ventures Kazakhstan" ЖШС – юниорлық компания. Тарқата айтсақ, бұл – дамудың бастапқы сатысындағы жобаларға бағдарланған шағын компания.
Осы орайда "Тау-кен Самұрық" ұлттық тау-кен компаниясы" АҚ юниорлық компанияларды қолдау бағдарламасын жүзеге асыруда. Геологиялық барлауға бағдарланған мұндай компанияларға акционерлік қоғам "бір терезе" қағидаты бойынша жан-жақты жәрдем ұсынады. Ондағы мақсат – тау-кен секторын дамытуды ынталандыру және минералдық-шикізат базасын молайту міндеттері шеңберінде қаржылық, сараптамалық, маркетингтік және мемлекеттік қолдау.
Санжар Беркінбай
Atameken Business Telegram каналына жазылып, маңызды ақпараттардан бірінші болып құлағдар болыңыз!
