Тәжікстан құрамасының бапкері: "Ертең Қазақстан соңғы шайқасқа шыққандай ойнайтын болады"

3165

Бас бапкер Қазақстан чемпионатының деңгейін Тәжікстанға қарағанда әлдеқайда жоғары деп бағалады.

Тәжікстан құрамасының бапкері: "Ертең Қазақстан соңғы шайқасқа шыққандай ойнайтын болады"

Тәжікстан құрамасының бас бапкерінің міндетін атқарушы Мубин Эргашев Қазақстанмен болатын матч алдында баспасөз мәслихатына қатысып, жергілікті тілшілердің сауалдарына жауап берді.

- Қазақстан – біздің өңірдегі ең мықты бәсекелестердің бірі. Біз жақсы әрі қызықты ойын күтеміз.

- Қазақстан құрамасы туралы не білесіз? Қай ойыншыны ерекше айтар едіңіз?

- Қазақстанда шетелде өнер көрсететін жақсы футболшылар бар. Қазақстан чемпионатының деңгейі бізден әлдеқайда күшті. Бір ойыншыны ерекше атап өтудің қажеті жоқ деп ойлаймын.

- Франциямен өткен матчты (0:8) көрдіңіз бе?

- Біз, негізінен осындай ойынды күткен едік. Ертең қарсылас жанкүйерлерінің алдында өздерін қалыпқа келтіруге тырысады. Олар соңғы шайқасқа шыққандай ойнайтын болады.

- Қазақстан мен Тәжікстан құрамалары соңғы рет 2014 жылы кездескен. Бұл кездесу 2:1 есебімен қазақстандықтардың пайдасына аяқталды. Осы матчтан кейін екі команда қаншалықты өзгерді деп ойлайсыз?

- Сол есте қаларлық матчтан бері бізде әлі де ойнап жүрген екі ойыншы бар. Футбол бір орында тұрмайды. Сіздің командаңыз да, біздің команда да алға жылжыды.

- 90-шы жылдар мен 2000-шы жылдардың басында Тәжікстанның футболшылары Қазақстанға емін-еркін келіп ойнады. Солардың бірі Даврон Ергашев. Соңғы кездері тәжікстандық футболшылар Қазақстан Премьер-лигасында неге ойнамай жүр?

- Олар қазірдің өзінде осында келуге қуана-қуана келісімін берер еді. Бірақ біздің ойыншылардың деңгейі командаларға сәйкес келмейтін шығар.

- Бұған дейін Қазақстан құрамасы Азияда ойнаса, қазір Еуропада ойнайды. Сіздің ойыңызша, Қазақстан құрамасы Азияда өнер көрсетсе, іріктеу кезеңінен өте алар ма еді?

- Солай деп ойлаймын. Қазақстанға Азияда ойнау сәл жеңілірек болар еді дер едім. Экономикалық жағынан да, футбол деңгейі жағынан да Қазақстан әлдеқайда дамыған мемлекет. Ал Тәжікстанда бәрі КСРО ыдырағаннан кейін салынды.

Ермұхамед Мәулен

Telegram
БІЗДІҢ ТЕЛЕГРАМ АРНАМЫЗҒА ҚОСЫЛЫҢЫЗ Ең соңғы жаңалықтар осында
Жазылу
Telegram арнамызға жазылыңыз! Жаңалықтар туралы бірінші біліңіз
Жазылу