17 жастағы қазақстандық теннисші Әмір Омарханов (ITF Juniors рейтингінде №4) жасөспірімдер арасындағы Australian Open-2025 турнирін сәтті бастады. Қарағандылық спортшының қарсыласы АҚШ-тан келген құрдасы Матисс Фарзам (рейтингте №45) болды. Бірінші айналымдағы кездесу Омархановтың пайдасына аяқталды – 7:6, 7:6. Теннисшілер матч барысында бірде-бір брейк жасаған жоқ. Бұл Әмір мен Матисс арасындағы алғашқы кездесу болды.
Айта кету керек, Омарханов Australian Open турнирінің екінші ракеткасы болып тіркелді. Өткен жылы ол Мельбурнде ширек финалға дейін жеткен. Осыдан бір күн бұрын турнирдің екінші айналымына тағы бір қазақстандық жасөспірім – 16 жастағы Занғар Нұрланұлы да жолдама алды.
Әлемдік жасөспірімдер рейтингінде 39-орында тұрған қазақстандық Занғар Нұрланұлы бірінші айналымда турнир ұйымдастырушыларынан wild card алған аустралиялық Николас Бейкерді 6:2, 3:6, 6:3 есебімен жеңді. Занғар өз мансабында әлі күнге дейін аустралиялық ойыншылардан жеңіліп көрген емес. 2023 жылы Juniors Davis Cup іріктеу кезеңінде Нұрланұлы Макфадзенді 5:7, 6:3, 6:1 есебімен, ал 2024 жылы дәл осы турнирдің іріктеу кезеңінде аты аңызға айналған Лейтон Хьюиттің ұлы Крузды 6:1, 6:0 есебімен ұтқан.
Екінші айналымда қазақстандық теннисші ITF Juniors рейтингінде 21-орында тұрған болгариялық Александр Васильевпен кездесетін болды.
