Астанадағы "Дәулет" теннис орталығында ересектер арасында Қазақстанның қысқы теннис чемпионаты мәресіне жетті.
Қыздар арасында алтын медаль үшін өткен финалда Альбина Какенова мен Іңкәр Дүйсебай кездесіп, тартысты ойын көрсетті.
Бір жарым сағатқа созылған матчта Інкәр Альбинаны 6:4, 7:5 есебімен жеңіп, алғаш рет Қазақстан чемпионы атанды.
Осылайша, 18 жастағы теннисші Қазақстан Республикасының спорт шебері нормативін орындады. Қола медаль үшін өткен кездесуде Аружан Сагандыкова Ева Корышеваға қарсы тамаша өнер көрсетіп, 3:6, 6:3, 6:2 есебімен жеңіске жетті.
Ерлер арасында өткен жылдың чемпионы Григорий Ломакин өз атағын сәтті қорғап, шымкенттік теннис мектебінің өкілі, биылғы біріншіліктің басты жаңалығы болған Никита Николенконы сенімді түрде жеңді. Финалдық ойын 6:4, 6:2 есебімен аяқталды.
Чемпионаттың тағы бір жаңа есімі – Таир Сарманов қола жүлдегер атанды. Үшінші орын үшін өткен кездесуде Таир Артём Сидоровты жеңді. Алғашқы сетте Сарманов 6:2 есебімен басым түсті, ал екінші сетте Артём жарақатына байланысты ойынды жалғастыра алмады.
Чемпионат аяқталған соң теннистен Қазақстан жасөспірімдер құрамасының капитаны Ярослава Шведова пікір білдірді:
"Жалпы, Қазақстан чемпионаты өте қызықты өтті. Жақсы дәстүр қалыптасты. Әр біріншіліктен кейін спорт шебері нормативін орындаған жаңа есімдер шығып жатады. Әсіресе, Team Kazakhstan академиясының тәрбиеленушілерін ерекше атап өткім келеді. Олар: Інкәр Дүйсебай, Альбина Какенова, Сатима Тореген, Таир Сарманов, Ерасыл Бахтияр және қола жүлдеге сәл ғана жетпей қалған Ева Корышева жақсы нәтиже көрсетті.
Team Kazakhstan академиясы Қазақстан теннис федерациясының президенті Болат Өтемұратовтың бастамасымен құрылғанын білесіздер және оның тәрбиеленушілерінің ел ішіндегі ғана емес, халықаралық турнирлерде де жоғары нәтиже көрсетіп жатқаны қуантады", – деді Ярослава Шведова.
Сонымен қатар жұптық сайыс бойынша Қазақстан чемпионатының жеңімпаздары да анықталды.
Жұптық сайыс нәтижелері:
Әйелдер:
1 орын – Сандуғаш Кенжибаева / Аружан Сагандыкова
2 орын – Сатима Тореген / Інкәр Дүйсебай
3 орын – Анастасия Крымкова / Альбина Какенова
Ерлер:
1 орын – Григорий Ломакин / Виталий Зацепин
2 орын – Таир Сарманов / Ерасыл Бахтияр
3 орын – Темірлан Карим / Артём Сидоров
