Бірінші болып кортқа қарағандылық Арысланбек Айтқұлов пен алматылық Никита Сидоров шықты. Қарағанды теннис мектебінің түлегі қарқынын бәсеңдетпестен 6:2, 6:0 есебімен жеңіске жетті. Сөйтіп ол өз спорттық жолында алғаш рет ересектер арасында ел біріншілігінің финалында ойнайды. Оның қарсыласы – Тимур Мәуленов. Мәуленов тәжірибелі Тимур Хабибуллинді жолдан тайдырды – 2:6, 7:6 (7:1), 7:6 (7:3).
Әйелдер арасында елордалықтар, 14 жасар Ариана Гогулина мен одан бір жасқа үлкен Альбина Кәкенова алтын жүлдені сарапқа салады. Ариана жартылай финалда Әдемі Аманкелдіден айласын асырды – 6:4, 4:6, 6:0. Ал Альбина Айя Мырзақұлованы ұтты – 7:6 (7:3), 6:4. Осылайша, 25 ақпан, сенбі күні Қазақстан қысқы біріншілігінде жаңа чемпиондардың есімі белгілі болады.
Сонымен қатар Алматы қаласында 17-19 наурызда алғаш рет мүгедек арбасындағы теннистен Қазақстан кубогі жарысы өтетіні белгілі болды. Турнирге Алматы, Астана, Қарағанды, Ақтау, Ақтөбе және Орал қаласынан 40-тан астам спортшы қатысып, бақ сынайды. Бірінші кубокке дайындық аясында Алматыда 6-16 наурыз аралығында теннисшілердің шеберлігін арттыруға арналған оқу-жаттығу жиыны өтеді. Дода қорытындысы бойынша биылғы маусым айында Италияда "Alghero Open" халықаралық турнирінде ел намысын қорғайтын спортшылар анықталады.
Қажетті ұпайды жинаған жағдайда қазақстандық паратеннисшілер 23 қыркүйек – 8 қазан аралығында Ханчжоуда (Қытай) болатын Паразия ойындарына қатысуға мүмкіндік алады.
