Тігінен тік көтерілетін Поджио Мурелла жотасында көшбасшылар тобынан Майкл Вудс пен Рафал Майка шабуылға шықты. Олар ізінен келе жатқан топтан сәл де болса басымдылық алды. Ал ол топтың ішінде "Астана Про Тим" шабандоздары Александр Власов пен Якоб Фульсанг бар еді. Нәтижесінде жеңісті Вудс тойлатты.
Із қуып келе жатқан топ араға 20 секунд салып мәре сызығын кесті. Власов 5 болса, Фульсанг 9 нәтижені тіркеді. Сонымен қатар, Александр Власов жастар класификациясында көшбасшы атанды.
"Тиррено-Адриатико" додасының үшінші кезеңі Фоллоникте басталып, 214 шақырымнан кейін Сатурниде аяқталды. Старттан 8 шабандоз жұлқып алға шықты. Оларды негізгі топ соңғы асудың алдына жете берген тұста ғана қуып жетті.
"Астана Про Тим" командасы жақсы жарыс өткізді деп айта аламыз. Алдымен алға озғандарды қуып жетті де, кейіннен өзінің екі шабандозын көшбасшылар қатарына енгізді.
- Кезең өте ауыр өтті. Күн райы да, жарыс жолы да оңайға соқпады. Алайда, соңына таман шабуылшылардың қарқынына ілесе алғаныма қуаныштымын. Біз Якоб екеуміз бір-бірімізге қолдау көрсетіп келдік. Бірақ, біздің топтағы шабандоздар алға озған екеуді қуып жетуге талпынбады. Тіпті бірігейік деген ұсынысқа да міз қақпады. Енді жарыстың ертеңгі күні қалай өрбитінін байқармыз. Ол жарыста мен жастар арасындағы үздік ретінде ақ жейдемен шығамын, - деді Александр Власов.
Майкл Вудс "Тиррено-Адриатико" жарысының жалпы есебінде бірінші орынға шықса, Александр Власов пен Якоб Фульсанг әзірге 10 және 11 орындарға жайғасты. Екі шабандозымыз жеңімпазға 30 секунд жеңіліп келеді.
Ертең 4 кезең: шабандоздар Терниден бастап Касцииге дейін екі ірі таулы аймағы бар 194 шақырымды жүріп өтеді.
Ермұхамед Мәулен
