"Тобыл" Қазақстан чемпионатының екінші айналымындағы алғашқы турда "Ақтөбені" жеңді. Матч "Тобыл Аренада" өтіп, 2:1 есебімен аяқталды. Кездесудің 16-минутында Тонго Думбия Руслан Валиуллинге қарсы тәртіп бұзды. Нәтижесінде "Ақтөбе" қақпасына пенальти белгіленді. Команда капитаны Азат Нұрғалиев бұл мүмкіндікті мүлт жібермеді. 28-минутта Дмитрий Мирошниченко командасының екінші голын соқты. Ал ойынның аяқталуына санаулы минуттар қалғанда Боян Дубайич есеп айырмасын қысқартты.
Үш ұпайды қоржынына салған Григорий Бабаян шәкірттері турнирлік кестеде 31 ұпаймен алғашқы орында тұрған "Астанаға" жақындады (34 ұпай). Ал "Ақтөбе" 13 ұпаймен он бірінші орырда қалды.
Сонымен қатар "Атырау" Қазақстан Премьер-лигасының он төртінші туры аясында "Ақжайықты" қабылдады. Матч Атыраудағы "Мұнайшы" стадионында өтіп, 2:0 есебімен аяқталды. Бірінші таймға қосылған қосымша уақытта "Атырау" шабуылшысы Алексей Родионов есеп ашты. 58-минутта Брайан екінші голды соғып, матчтың нүктесін қойды. Қатарынан екі мәрте Батыс дербиінде жеңіліске ұшыраған оралдық клуб турнирлік кестеде 21 ұпаймен төртінші орында қалды. 21-ші ұпайын қоржынға салған "Атырау" бір саты төменде тұр.
"Ордабасы" Қазақстан Премьер-лигасының он төртінші турында қарағандылық "Шахтермен" кездесті. Матч Қажымұқан Мұңайтпасов атындағы стадионда өтіп, 0:0 есебімен аяқталды. Ойынның алғашқы таймында қос команда да нақты гол соғатын мүмкіндіктер жасай алмады. 57-минутта "Шахтер" қақпасына пенальти белгіленді. Жоао Паулоның тепкен добын Игорь Шацкий қайтарып, командасына бір ұпай сыйлады. Кезекті рет бір ұпайға қол жеткізген шымкенттік клуб 18 ұпаймен тоғызыншы орынға сырғыды. "Шахтер" 9 ұпаймен он үшінші орында тұр.
"Каспий" Қазақстан Премьер-лигасының он төртінші турында "Астананы" қабылдады. Матч Ақтау қаласындағы "Жас Қанат" стадионында өтіп, 2:2 есебімен аяқталды.
Ойынның небәрі 8-минутында Тигран Барсегян әріптесінен тамаша пас алып, есеп ашты. Ал 31-минутта Роман Мұртазаев алыстан соққы бағыттап көрген еді, қақпашы Марко Милошевич өрескел қателікке бой алдырып, екінші голды жіберіп алды. Бірақ 52-минутта Талғат Кусяпов есеп айырмасын қысқартты. Сегіз минуттан кейін Аслан Дарабаев айып алаңның сыртынан соққы жасап, тоғыздықты дәл көздеді. Бұл ойыннан кейін елордалық клуб 34 ұпаймен көш басында қала берді. 20 ұпайы бар "Каспий" алтыншы орынын сақтап қалды.
Ермұхамед Мәулен
