Қазақстандық боксшы Сәкен Бибосынов Олимпиада ойындарының ширек финалына шықты. 52 килоға дейінгі салмақта сынға түскен отандасымыз 1/8 финалда франциялық Билал Беннамаға қарсы шығып, 5:0 (29:28, 29:28, 29:28, 29:28, 29:28) есебімен жеңіске жетті. Енді ширек финалда Бибосынов испаниялық Габриэль Эскобарға қарсы шығады.
63-келіге дейінгі салмақта өнер көрсететін тағы бір қазақстандық боксшы Закир Сафиуллин Олимпиаданың ширек финалына жекпе-жексіз жолдама алды. Оның қарсыласы жапониялық Дайсуке Наримацу жарақатына байланысты жұдырықтасудан бас тартты. Сафиуллиннің келесі қарсыласы 3 тамызда сағат 18: 35 -те аустралиялық Гарри Гарсайд болады.
Әлемнің 20 ракеткасы қазақстандық Елена Рыбакина қола жүлде үшін сайыста әлемнің 6-нөмірлі ракеткасы украиналық Элина Свитолинамен кездесті. Алғашқы сет басталысымен Еленаның сәл қобалжығанын байқадық. Дегенмен біраз уақыттан соң басымдықты өз қолына алып, бірінші сетте 6:1 есебімен жеңіске жетті.
Ал екінші сет Элинаның пайдасына 6:7 аяқталды.Үшінші сетте де Еленаның жолы болмай, 4:6 есебімен жеңіліп қалды. Нәтижесінде украиналық теннисші Олимпиада ойындарының қола жүлдегері атанды. Дегенмен, Елена бар күшін салып, соңына дейін күресті. Алдағы уақытта Елена жеңістерімен қуантады деген үміттеміз.
Ермұхамед Мәулен
