• Егер "Қайрат" Еуропа Лигасының үшінші іріктеу кезеңінен өте алмаса, Конференция Лигасының плей-офф кезеңінде "Линфилд" - "Фола" жұбының жеңімпазына қарсы ойнайды. Үшінші іріктеу кезеңінде алматылық команда "Алашкерт" деген Армения клубына қарсылас атанды. Бұл команданы негізі еш қиналмай жеңіп шыға алатын қауқары бар. Егер келесі айналымға шықса Солтүстік Ирландияның "Линфилд" немесе Люксембург елінің "Фола" командасымен кездесетінін де айта кетйік. Алғашқы матч 19 тамызда сырт алаңда өтеді. Қарымта кездесу 26 тамызда Алматының Орталық стадионында өтеді.
• Егер "Астана" қос кездесудің қорытындысы бойынша финляндиялық КуПС командасын жеңсе, Конференция Лигасының плей-офф кезеңінде Бундеслигада өнер көрсететін "Унион Берлин" клубымен ойнайды. Алғашқы матч 19 тамызда сырт алаңда, ал қарымта ойын 26 тамызда "Астана Аренада" өтеді.
• "Шахтер" "Колос" командасынан айласын асырса, Конференция Лигасының плей-офф кезеңінде "Спартак Трнава" - "Маккаби Тель-Авив" жұбының жеңімпазымен ойнайды. Алғашқы матч 19 тамызда Нұр-Сұлтанда, ал қарымта кездесу 26 тамызда қарсыластың алаңында өтеді.
• "Тобылдың" Конференция Лигасының плей-офф кезеңіндегі қарсыласы анықтады. Қостанайлық клуб Еуропа Лигасының үшінші іріктеу кезеңінде бір-біріне қарсы ойнайтын "Яблонец" - "Селтик" жұбында жеңілген командамен кездеседі. Алғашқы матч 19 тамызда өтеді. Қарымта матч 26 тамызда "Астана Аренада" өтеді.
Естеріңізге сала кетейік, ол ойынға жету үшін қостанайлық клуб Конференция Лигасының үшінші іріктеу кезеңінде словакиялық "Жилинаны" жеңуі керек. Ал жалпы жеребеге байланысты айтар болсақ, биыл қазақ футболында бұрын-соңды болмаған оқиға тіркелуі тиіс. Яғни, кем дегенде 2 клубымыз топтық кезеңге шығатын секілді. "Қайраттың" Еуропа лигасының топтық кезеңіне өтетін тамаша мүмкіндігі бар. Сонымен қатар, "Тобылдың" да жеребесі жақсы түсті деп есептейміз.
Ермұхамед Мәулен
