BILD басылымының жазуынша, украиналық дрондар "Нижнекамскнефтехим" химиялық кешенін және Таганрогтағы қосалқы станцияны нысанаға алды, деп хабарлайды inbusiness.kz сайты.
15 қарашаға қараған түні ұшқышсыз ұшу аппараттары Татарстанда орналасқан Ресейдің ең ірі мұнай-химия кешенін атқылады. Әлеуметтік желілерде жарияланған видеолардан кәсіпорын төбесінен көтерілген қою қара түтінді байқауға болады.
"Нижнекамскнефтехим" зауыты шамамен 8,5 шаршы километр аумақты алып жатыр. Бұл 1200 футбол алаңына тең. Мұнда пластмасса мен синтетикалық каучук да шығарылады. Кәсіпорын өнімі қорғаныс өнеркәсібінде қолданылатын ресейлік "Сибур" концерніне тиесілі. Синтетикалық каучук пен арнайы пластмассалар әскери жабдықтардың маңызды бөлшектері болып саналады.
Өңірлік денсаулық сақтау министрлігінің дерегінше, көпқабатты тұрғын үйге зақым келген. Мемлекеттік БАҚ оқиға салдарынан үш адам зардап шеккенін жазды. BILD хабарлауынша, бұл ақпаратты тексеру мүмкін емес болып отыр.
Белгілі болғандай, бұл "Нижнекамскнефтехим" зауытына жасалған бірінші шабуыл емес. 2026 жылдың 10 тамызында кәсіпорынға жасалған әуе шабуылынан 13 адам қаза тапты, олардың арасында Өзбекстан мен Тәжікстан азаматтары болды. Тағы 75 адам жарақат алды. Бұл туралы ресейлік БАҚ жазды.
Украина дрондары Ресейдің Ростов облысына қарасты Таганрог қаласындағы электр қосалқы станциясына да соққы жасады. Ресейлік билік нысанның бас инженері қаза тапқанын, қосалқы станцияға қатысты теміржол қатынасы уақытша тоқтатылғанын мәлімдеді. Сондай-ақ атып түсірілген дрондардың сынықтары автокөліктердің үстіне құлады. Ростов облысы губернаторының сөзінше, 3 ер адам мен 1 әйел зардап шекті.