Қазақстандық теннисші, 17 жастағы Заңғар Нұрланұлы жасөспірімдер арасында АҚШ ашық чемпионатының жартылай финалына жолдама алды, деп хабарлайды inbusiness.kz сайты.
ITF Juniors рейтингісінде 54-орында тұрған Заңғар Нұрланұлы ширек финалда жарыстың 13-ракеткасы ресейлік, 18 жастағы Тимофей Дерепаскомен шеберлік байқасты.
Т.Дерепаско – жасөспірімдер ғана емес, ересектер арасында да ойнап үлгерген теннисші, ол ATP рейтингісінде 925-орында тұр.
Бірінші партияда есеп 1:1 болған мезетте Заңғар брейк жасай білді. Содан кейін тағы бір брейкке қол жеткізді – 6:2.
Екінші сетті З.Нұрланұлы брейкпен бастағанымен, соны жалғастыра алмады – 1:1. Дегенмен есеп 3:3 болғанда, қайыра брейк жасап, өз геймін алды – 5:3. Содан кейін матчты жеңіспен түйіндеді – 6:4.
Бір жарым сағатқа жуық уақытқа созылған бәсекеде Заңғар батыл өнер көрсетіп, қарсыласының алдын орап кетіп отырды.
Заңғар Нұрланұлы финалға шығу үшін жасөспірімдер арасында әлемнің 1-ракеткасы, болгариялық Иван Иванов немесе германиялық Максим Шонхауестің арасында жеңген теннисшімен таласады.
Айта кетейік, З.Нұрланұлы жасөспірімдер арасында қазақстандықтардан осындай табысқа алғаш рет жетіп отыр.
