Әлем және олимпиаданың қаншама рекордын жаңартқан бұл ямайкалық желаяқты білмейтін адам жоқ шығар. Енді оны кәсіпқой футболшы ретінде көру кімге болса да қызық шығар.
Көз алдыңызға елестетіп көріңізші. Егер ол шабуылшы ретінде алаңға шықса не болады: 100 метрді 9-10 секундта жүгіріп өтетін жігіт үшін 20 метрдегі допқа бірінші боп жету қиын ба?! Ал оны қуып жетіп көр, ең бастысы – аяғына доп тие қалса болғаны, арғы жағы голға ұласып жататынына ешкім күмән келтіре қоймас.
Ал, ол үшін Усэйн Болтқа біраз тер төгіп доппен алысуға тура келеді. Доп тебу де оңай шаруа емес екенін жақсы түсінетін жеңіл атлет те бірден алаңға шыға қоймаса керек-ті.
Ол алдымен ресми түрде 2017 жылы жеңіл атлетикамен қоштаспақшы және қазіргі таңда сол шаруаға кірісіп те кетті. Усэйн Болт кәсіпқой футболшы болу үшін Дортмундтың Боруссиясымен келіссөз жүргізіп жатыр. Оның айтуынша, жақын күндері неміс командасымен бірге жаттығуды бастамақшы. Сонымен қатар, ол өзінің баяғыдағы арманына қол жеткізгісі келетіндігін жасырмады.
Сөйтсек, Усэйн Болт баяғыдан бері ағылшындардың Манчестер Юнайтед (МЮ) футбол клубының жанкүйері екен және оның бас жаттықтырушысы Жозе Моуриньомен кездесуді аңсап жүрген көрінеді. "Егер мен болашақта осы МЮ қатарында ойнауға мүмкіндік алсам, онда менен өткен бақытты адам болмайтын еді",– деп жар салды Усэйн Болт.
Осы айтқанымыздың бәрін әйгілі неміс кәсіпкері әрі ірі футбол акционерлерінің бірі, дортмундтық Боруссияның бас директоры Ханс-Йоахим Ватцкенің өзі растап отыр. Оның айтуы бойынша, бұл ешқандай да қалжың емес, маркетингтік айла-тәсіл де емес, бұл – шындық! Усэйн Болт Боруссияда жаттығатын болады.
Жанат Қалықов
