/img/tv1.svg
RU KZ
KASE 2 383,97 Hang Seng 27 386,82
DOW J 29 225,93 РТС 1 535,81
FTSE 100 7 436,64 Алтын 1 630,50
«Ұсталған Болат Бақауов емес...»

«Ұсталған Болат Бақауов емес...»

«Парамен ұсталды» деген оның орынбасары да жұмыста жүр. 

16 Қаңтар 2020 12:36 4623

«Ұсталған Болат Бақауов емес...»

Автор:

Фархат Әміренов

Кеше кешкісін әлеуметтік желілер мен ақпараттық сайттарда «Павлодар облысының әкімі Болат Бақауов пен оның көмекшісі парамен ұсталды» деген ақпарат тарап, жұртшылық шу ете түсті. Артынша «Әкімді жиналыс жүргізіп отырған жерінен ұстап, қолына кісен салыпты» деген ақпарат шықты. Енді біреулер оның «параны ақшамен емес, алтынмен алғанын» жарыса жазып жатты. Елдің ентігі басылған сәтте «әкім тергеліп жатыр» деген сөз тарады. Ел ішінде алып-қашпа түрлі әңгімелер айтылып, түрлі байламдар жасала бастағандықтан Павлодар облысы әкімінің баспасөз қызметі арнайы мәлімдеме жасады. 

«БАҚ-та, әлеуметтік желілер мен мессенджерлерде «Павлодар облысының әкімі ұсталды, тергеліп жатыр» деген мазмұндағы хабарламалар мен аудиожазбалар таралуда. Дәл қазіргі уақытта аталған ақпаратты растайтын ресми деректер жоқ. Ресми деректер жарияланғанға дейін қандай да бір тұжырым жасаудан аулақ болуға шақырамыз. Біз Сіздерді өзіміздің әлеуметтік желілер арқылы хабардар ететін боламыз», – делінген әкімдіктің хабарламасында. 

Ал түнгі ондар шамасында Болат Бақауов өзінің Instagram желісіндегі жеке парақшасына күндіз өткізген жиналыстар туралы жазба қалдырды. Жазбаның соңы былай аяқталған: «... Осы аптада Павлодар облысының басқа да басқармаларының қатысуымен алқа мәжілісі форматындағы кездесулерді жалғастыратын боламыз». Жазбаны оқыған адам әкімнің жұмысты одан әрі жалғастыратынын аңғартысы келгенін бірден ұғары анық. 

Бір қызығы, осыдан соң «парамен ұсталған Болат Бақауов емес, оның орынбасары Арыстан Қабыкенов екен» деген ақпарат тарады. Әлдекімдердің жазуынша, «тінту жұмыстары дәл осы Қабыкеновтің кабинетінде жүргізілген».

Көпшілік бүгінгі күнді асыға күтті. Алдын ала жасалған хабарламаға сәйкес, бүгін Болат Бақауов екі бірдей басқарманың алқа мәжілісіне қатысуы керек еді. Алайда, екі жиын да кейінге шегеріліпті. 

Көп кешікпей Павлодар облысы әкімінің баспасөз қызметі келесі мәлімдемені хабарлады. 

«Дәл қазіргі уақытта облыс әкімдігінің басшылығы күнделікті режимге сәйкес жұмыс істеуде. Әкім жұмыс орнында жоқ. Дегенмен, ол жұмыс бабы бойынша қала ішінде жүр. Ол таңертең Инвесторлар үйінде жиын өткізуі керек еді. Жұмыс кестесінің тығыздығына байланысты кездесуді оның орынбасары Арыстан Қабыкенов жүргізді», – делінген баспасөз қызметінің мәлімдемесінде. 

Осы хабарламаға сенсек, кеше түнде айтылған әңгімелердің бәрі шындыққа жанаспайтындай. Өйткені, әкім де, оның орынбасары Арыстан Қабыкенов те жұмыста жүр.

Сонда ұсталған кім?

Біз жағдайды назарда ұстайтын боламыз.  

Фархат Әміренов

inbusiness.kz-ті қараңыз, оқыңыз :

Павлодар облысына жаңа әкім тағайындалды

Енді өңірді Әбілқайыр Сқақов басқарады.

21 Қаңтар 2020 08:26 3902

Павлодар облысына жаңа әкім тағайындалды

Фото: azattyq-ruhy.kz

Жаңа әкімді бүгін таңертең ҚР Премьер-министрі Асқар Маминнің өзі әкеп таныстырды.

Әбілқайыр Бақтыбайұлы Сқақов Павлодар облысының тумасы. 1974 жылы дүниеге келген. Жаңа қызметке тағайындалғанға дейін Қазақстан Республикасы Қаржы министрлігінің қаржы мониторингі комитетінің төрағасы қызметін атқарды.

Мамандығы – салықшы, қаржыгер. 

Ақмола қаржы-экономикалық техникумын, Шәкәрім атындағы Семей мемлекеттік университетін, Қазақ құқықтану және халықаралық қатынастар институтын, М.В.Ломоносов атындағы Мәскеу мемлекеттік университетін тәмамдаған. 

1995 жылдан 2005 жылға дейін Павлодар облысы бойынша салық инспекциясының маманы, салық инспекторы, аға салық инспекторы, бөлім бастығы, Павлодар қаласы бойынша Салық комитеті төрағасының орынбасары қызметтерін атқарған.

2005-2006 жылдары Павлодар облысы қазіргі Тереңкөл ауданы бойынша Салық комитетінің төрағасы, 2006-2008 жылдары Павлодар облысы Денсаулық сақтау департаменті директорының орынбасары, 2008-2010 жылдары Павлодар облысы бойынша Салық департаментінің Павлодар қаласы бойынша салық басқармасының бастығы, 2010-2012 жылдары Қостанай облысы бойынша Салық департаментінің бастығы болып еңбек еткен. 

2012-2014 жылдары Қазақстан Республикасы Қаржы министрлігінің Салық комитеті төрағасының орынбасары, 2014 жылдан 2016 жылға дейін Астана қаласы бойынша Мемлекеттік кірістер департаментінің басшысы, 2016 жылғы 1 желтоқсаннан 2019 жылдың сәуіріне дейін Қорғаныс министрінің орынбасары болып қызмет атқарды.

2019 жылдың сәуірінен бүгінгі тағайындауға дейін ҚР Қаржы министрлігі Қаржы мониторингі комитетінің төрағасы болып еңбек етті. 

«Қазақстан Республикасының тәуелсіздігіне 20 жыл» (2011), «Ерен еңбегі үшін» (2014), Салық қызметінің үздігі (2011), Қаржы қызметінің үздігі (2012), Мемлекеттік қызмет үздігі (2014) төсбелгілерімен марапатталған. 

Еске сала кетейік, Павлодар облысын бұған дейін Болат Бақауов басқарған болатын. Ол бұл қызметке 2016 жылдың 25 наурызында тағайындалған еді. Ал 2020 жылдың 15 қаңтарында қызметін асыра пайдаланғаны үшін қамауға алынды. 

Павлодар қаласының мамандандырылған тергеу соты Болат Бақауовты екі айға қамауға алу туралы шешім шығарды. Ол ҚР Қылмыстық Кодексінің 362-бабы 4-бөлігінің 3-тармағы яғни «Өзi немесе басқа адамдар немесе ұйымдар үшін пайда мен артықшылықтар алу не басқа адамдарға немесе ұйымдарға зиян келтiру мақсатында билікті немесе лауазымдық өкілеттіктерді асыра пайдалану» бойынша күдікті деп танылды. Аталған бап бойынша санкция мүлік тәркілеуді, белгілі бір лауазымдарды атқару немесе белгілі бір қызметпен айналысу құқығынан өмір бойына айыра отырып, 5 жылдан 10 жылға дейінгі мерзімге бас бостандығынан айыру жазасын көздейді. 

Болат Бақауов – Павлодар облысының қызметтен түсіп, қамауға алынған үшінші әкімі. Бұған дейін саяси көзқарасы үшін Ғалымжан Жақиянов және жемқорлық үшін Ерлан Арын қызметінен кеткен болатын.  

Фархат Әміренов

Павлодар әуежайына күрделі жөндеу керек

Әуежайдағы күрделі жөндеу жұмыстары соңғы рет осыдан сегіз жыл бұрын жасалған.

05 Қаңтар 2020 16:03 1963

Павлодар әуежайына күрделі жөндеу керек

Өткен жылдың соңында Павлодар облысының әкімі Болат Бақауов бізге берген сұхбатында облыс орталығындағы әуежайды заманауи үлгіде дамыту қолға алынатынын мәлімдеген еді.

«Биыл Павлодар қаласының әуежайы Open Sky мәртебесін, яғни халықаралық мәртебені иеленді. Енді бұл әуежай халықаралық рейстерді орындайды. Сондықтан әуежайды жаңаша дамыту керек. Осы орайда, Түркияның «EDA» компаниясымен жұмыс жүргізіп жатырмыз. Бұл компания Қазақстан нарығында жұмыс істейді. Сондықтан әуежай жаңаша түрленеді деген ойдамын», – деген болатын өңір басшысы.

Ал бүгін Павлодар облысы әкімінің баспасөз қызметі әуежайдың бірқатар маңызды бағыт бойынша жаңа авиамаршруттар ашуды жоспарлап отырғанын хабарлады. Қазір авиакомпаниялармен келісім жұмыстары жүргізіліп жатқан көрінеді.

Деректерге сүйенсек, 2019 жылдың 11 айында әуежай арқылы 300 мың тоннадан астам жүк пен пошта жеткізілген. Ал дәл осы аралықта 200 мыңнан астам адамды тасымалданған.

«Бүгінде әуежай халықаралық мәртебеге ие. Соңғы рет 2018 жылы тиісті сертификатты алды. Ол үш жылға жарамды. Әуе байланысы саласында жинақтаған тәжірибеміз мол. Сондықтан біз үшін жолаушылардың қауіпсіздігі мен оларға толыққанды жағдай жасау маңызды. Әуежай 1973 жылы пайдалануға берілді. Содан бері біздің команда жолаушыларды жерге қаратқан емес. Жыл сайын бұл жерден 1 мыңға жуық ұшақ ұшады. Бір сағатта 200-ден астам жолаушыны жөнелтеміз», – дейді «Павлодар әуежайы» АҚ төрағасының орынбасары Динара Мусалимова.

Бүгінде Павлодар әуежайы арқылы тұрақты түрде екі ішкі әуе байланысы жұмыс істейді. Яғни, Нұр-Сұлтан, Алматы бағыттарына жолаушылар тасымалданады. Сондай-ақ, Түркия, Мәскеу, Минск және Новосібір бағытындағы халықаралық рейстер бар. Әуежайдағы жолаушылар тасымалын көбейту үшін оған күрделі жөндеу жұмыстарын жүргізу керек.

«Әуежайдың аумағы 235 гектар жерді алып жатыр. Ал терминалдың аумағы 3,2 мың шаршы метрге тең. Соңғы рет бұл жерге 2006 және 2012 жылдары күрделі жөндеу жұмыстары жүргізілді», – дейді Динара Мусалимова.

Еске сала кетейік, 2019 жылдың қыркүйек айында аталған әуежай Павлодар облысы әкімдігінің меншігіне өткен болатын. Ал бұған дейін оның акциялары «Самұрық-Қазына» ұлттық әл-ауқат қорына тиесілі еді.

Жалпы, осы күнге дейін Павлодар әуежайы бірнеше құрылымға қарап келді. Мәселен, 1998 жылдың соңында «Ертіс-Авиа» әуекомпаниясынан бөлініп, жеке кәсіпорынға айналды. 2000 жылы әуежай акциясы толықтай Павлодар облысы әкімдігінің коммунальдық меншігіне өтті. Алты жылдан кейін нысанды ҚР Көлік және коммуникация министрлігі, ал бірнеше айдан кейін «Самұрық» Холдингі» АҚ «бауырына басты». 2018 жылы әуежайды ұлттық әл-ауқат қорына айналған «Самұрық»-тан алып, Атырау, Ақтөбе әуежайлары секілді жекеменшікке беру туралы шешім қабылданды. Алайда оны 9,2 млрд теңгеге ешкім сатып алғысы келмеді. Ақыры әуежай облыстық әкімдіктің меншігіне қайтта өтті.

Фархат Әміренов

inbusiness.kz-ті қараңыз, оқыңыз :

Жаңалықтарға жазылу: