Соңғы деректерге сүйенсек, Қазақстанда төлем картасын ұстаушылардың саны көбейіп келеді. Мәселен, 2018 жылдың тамыз айында 17,8 млн адамның төлем картасын пайдаланатыны анықталды. Аталған көрсеткіш бір жыл бұрынғы деңгейден 14,2%-ға жоғары.
Карта ұстаушылардың 99,8%-ы халықаралық жүйедегі төлем карталарын пайдаланғанды құп көреді. Бір жыл ішінде олардың саны 14,5%-ға көбейіп, 17,7 млн адамға жеткен. Ал жергілікті жүйедегі төлем карталарын ұстаушылардың үлесі 46%-ға қысқарып, небары 38,6 мың адамды құраған.
Карта пайдаланатындардың 11,1 миллионы Visa жүйесін таңдаған. Олардың саны MasterCard карталарын ұстаушылардан (5,6 млн адам) екі есе жоғары.
Ranking.kz-тің мәліметінше, осыдан бір жыл бұрын Visa картасын ұстаушылар MasterCard-ты пайдаланатындардан 2,8 есе көп болған. Яғни, былтыр 10,6 млн адам Visa-ны, 3,8 адам MasterCard-ты қолданған.
Бүгінде әлемдік екі алпауыттың арасалмағы қысқарып келеді.
Жалпы Қазақстанда айналымда жүрген халықаралық жүйедегі төлем карталарының үлесі төмендегідей: Visa – 13,3 млн, MasterCard – 10,2 млн.
Халықаралық жүйелердің екеуінде де дебеттік карталардың үлесі көп. Visa жүйесінде 9,5 млн, ал MasterCard-та 6,6 млн дебеттік карта бар. Екі жүйедегі кредиттік карталардың саны бірдей. Әрқайсысында 3,2 млн кредиттік картадан бар. Өзге карталардың саны Visa-да – 640 мыңға, MasterCard-та 376,9 мыңға тең.
Бір қызығы, Visa жүйесін пайдаланатындар көп болғанымен, MasterCard-тың айналымдағы карталар санының жыл сайынғы өсімі әлдеқайда жоғары. Мәселен, MasterCard-тың өсімі 47,3% болса, Visa-ның өсімі небары 15%-ға ғана тең.
Еске сала кетейік, әлемнің 200-ден астам мемлекетінде пайдаланылатын Visa жүйесі арқылы бір жылда жасалатын сауда айналымы 4,8 трлн АҚШ долларына тең. Ал MasterCard-тың таза табысы 1,492 млрд АҚШ долларын құрайды.
Фархат Әміренов
