Соңғы кездері шетелдік чемпионаттарда бағын сынап жүрген отандық футболшылар көбейіп келеді. Мұны бәрінен бұрын жасағандардың бірі - Владислав Васильев. Ол Беларуссия чемпионатында сәтті өнер көрсетуде. Қарағанды футбол мектебінің тәрбиеленушісі өткен жылы "Рух" клубының намысын қорғап, шетелдік чемпионатта гол + пас жүйесі бойынша ең үздік қазақстандық ойыншы болды (26 матчта 8 гол + 6 пас).
- Владислав, қайырлы күн! Сізді барлық өткен мерекелеріңізбен және өткен жылғы "Рух" сапындағы керемет өнеріңізбен құттықтауға рұқсат етіңіз! Түрлі ақпарат көздері сіздің осы командамен толыққанды келісім-шарт жасасқаныңыз туралы айтуда. Бұл қаншалықты рас?
- Сәлеметсіз бе! Құттықтауыңызға рахмет! Жоқ, бұл ақпарат шындыққа сәйкес келмейді. Әр түрлі командалардың ұсыныстарына қарамастан, мен "Динамода" қалып, келісім-шартты аяқтау туралы шешім қабылдадым. Бұл клуб бір кездері маған сенім артқан еді. Содан кейін менің мансабымда қиын кезең болды. Мен бұл клубқа лайықты жауап бергім келеді.
- Сізге қазақстандық клубтар қызығушылық танытуда деген ақпарат болды. Кейбір ақпарат көздері сізбен байланысқа шыққан командалардың бірі "Астана" деп хабарлады.
- Иә, шынымен де, маған Қазақстаннан бірнеше ұсыныс түсті. Бірақ мен байланысқан клубтардың атын атағым келмейді. Өйткені бұл енді маңызды емес. Бүгінгі таңда "Динамо Брест" қиын жағдайға тап болды. Мен осы кезеңде командаға көмектесуді және олардың алдындағы қарызымды қайтаруды өзімнің міндетім деп санадым.
- Өткен жылы сіз үшін тағы бір жағымды сәт - бұл Қазақстан құрамасындағы дебют. Беларуссияға қарсы матчта өнер көрсеттіңіз. Қандай сезімдерді бастан кешірдіңіз. Ойынның өзі қалай болды?
- Ұлттық құрамада ойнау кез-келген футболшы үшін үлкен мәртебе. Мен де солардың қатарындамын. Сөзбен айтып жеткізу мүмкін емес сезім. Мен мұндай эмоцияны қайтадан бастан өткергім келеді. Барынша жұмыс істейтін боламын және ұлттық құрамаға қайта оралу үшін барымды саламын.
- Өзіңіз білетіндей, ұлттық құрамада бапкер ауысты. Талғат Байсуфинов туралы не айта аласыз?
- Мен бұл маман туралы көптеген жақсы пікірлер естідім. Талғат Маруанұлы ұлттық құрамада жұмыс істеп үлгерді. Жақсы нәтиже көрсетті. Бөтен адам емес. Сондықтан, оның басшылығымен біздің команда жақсы өнер көрсетіп, өзіне жүктелген міндеттерді орындайды деген үміт бар.
- Сіздің бұрынғы клубыңыз "Шахтер" өткен маусымда ҚПЛ-да сәтті өнер көрсетіп, еурокубокқа жолдама жеңіп алды. Команданың ойынын бақыладыңыз ба?
- Иә, мен "Шахтердың" ойындарын бақылаймын және мұндай нәтижелерге өте қуаныштымын. Бұл қарағандылық клубтың бұрынғы деңгейіне қайта оралуға мүмкіндік береді.
- Соңғы уақыттағы жағымды тенденция - отандық ойыншылардың шетелдік чемпионаттарға кетуі. Сіз бұл туралы не ойлайсыз? Сіз Беларуссия чемпионатына қалай ауыстыңыз?
- Әрине, мен өсу үшін шетелдік командаларға баратын жігіттерді қолдаймын. Бұл әрдайым қаржылық жағынан тиімді болмайтыны түсінікті. Бірақ ойыншылар, әсіресе жас ойыншылар қолда бар мүмкіндікті пайдалануы керек. Өзіңізді басқа деңгейде көрсетіңіз. Мен Қарағандыда жүрген кезімде мансабымды аяқтау туралы да ойладым. Алайда, өз мансабымды қайта бастадым. Содан кейін мені Ұлықбек Асанбаев пен Анатолий Юревич қолдады. Сол үшін оларға көп рахмет! Олар маған сеніп, Беларуссияға кетуге көмектесті. Мен осы чемпионатта өз орнымды таба алдым. Сондықтан, біздің ойыншыларға мүмкіндігінше шетелде өз күштерін сынап көруге кеңес беремін.
- Футболшылардың агенттері осы трансферді жүзеге асыруда маңызды рөл атқарады...
- Иә сіздікі дұрыс. Жақында мен осындай жағдайға тап болдым. Мен Янина Поборцеваның адвокаттық кеңсесімен келісім-шартқа отырдым. Ол маған келісім-шарт жасасқанда заңгерлік қызмет көрсетуге уәде берді. Бірақ іс жүзінде бұл басқаша болды. Менің түсінгенімдей, олар менің басқа клубқа ауысуымнан ақша тапқысы келді. Алайда, бұл менің "Динамода" қалып, келісім-шартымды толықтай аяқтаймын деген жеке ниетіммен сәйкес келмеді. Сондықтан, иә, бұл мәселелерде сіз өте мұқият болуыңыз керек. Бұл өте маңызды.
- Владислав, қазақстандық жанкүйерлер сіздің ойыныңызды мұқият бақылайды. Сіздің оларға айтар тілегіңіз бар ма?
- Біріншіден, мен барлық жанкүйерлерге және барлық қазақстандықтарға денсаулық тілеймін. Қазір бұл өте маңызды. Жақында футбол жанкүйерлері трибунаға оралады деп үміттенемін. Өйткені оларсыз ойын қызық болмайды. Көріскенше!
- Сұхбатыңызға рахмет!
Ермұхамед Мәулен
