Қазақстандық теннисші Юлия Путинцева АҚШ-та өтіп жатқан беделді Чарльстон турниріндегі алғашқы ойынында сенімді жеңіске жетті.
Әлемдік рейтингте 72-орында тұрған отандасымыз бірінші айналымда жаңа зеландиялық Лулу Санға қарсы ойнап, екі сетте басым түсті – 7:6, 6:2.
Кездесу барысында Путинцева тай-брейкке созылған алғашқы сетте мінез көрсетті. Екінші сетте ол толықтай басымдыққа ие болып, матч тағдырын өз пайдасына шешті.
Бұл жеңіс қазақстандық спортшыға турнирдің екінші айналымына шығуға мүмкіндік берді. Енді оны әлдеқайда күрделі сынақ күтіп тұр. Келесі кезеңде Путинцева жарыстың басты фавориті, әлемнің 5-ракеткасы Джессика Пегулаға қарсы кортқа шығады.
Айта кету керек, Пегула осы турнирдің қазіргі чемпионы және өз алаңында өте қауіпті қарсылас саналады.
Чарльстондағы турнирдің жүлде қоры 2,3 миллион долларды құрайды. Жеңімпаз 354 мың доллардан астам сыйақы алып, 500 рейтингтік ұпай еншілейді.
