Қазақстандық теннисші Зарина Дияс ел абыройын тағы бір мәрте асқақтатты. Әлемнің 283-ракеткасы Чэнду (Қытай) қаласында өткен Аустралия ашық чемпионатына Азия – Тынық мұхит аймағы бойынша іріктеу турнирінде үздік ойын көрсетіп, жарыстың жеңімпазы атанды.
Финалдық кездесуде Дияс Тайбэйден келген бәсекелесі Лян Эньшуомен кортқа шықты. Жанкүйерлер асыға күткен матчта Зарина сенімді ойын өрнегін көрсетіп, қос сетте де қарсыласын 6:3, 6:4 есебімен тізе бүктірді.
Осы нәтижесінің арқасында Зарина Дияс 2026 жылғы маусымдағы алғашқы "Үлкен дулыға" турнирі – Аустралия ашық чемпионатына қатысу құқығына ие болды.
Айта кету керек, Зарина бұған дейін де Мельбурн корттарында талай мәрте өнер көрсеткен. Ол 2014, 2015, 2020 және 2021 жылдары Australian Open турнирінің үшінші айналымына дейін жеткен.
