Қазақстандық теннисші Зарина Дияс Australian Open турнирін үшінші айналымнан кейін аяқтады. Бүгін, 12 ақпан Зарина әлемнің экс-бірінші ракеткасы және "Үлкен дулыға" турнирлерінің екі титулының иегері испаниялық Гарбинье Мугурусамен кездесті. Матч бір сағатқа созылды және екі сетте де 1:6 есебімен қазақстандық теннисшінің жеңілісімен аяқталды. Дияс бірде-бір эйс жасаған жоқ және брейк-паойнт та иелене алмады. Оған қоса бір рет екі еселенген қателікке жол берді.
Айта кетейік, Аустралияның ашық біріншілігінде жекелей сында Қазақстанның жалғыз өкілі - Юлия Путинцева ғана қалды. Сенбі, 13 ақпан күні ол үшінші айналымда Әлемнің бесінші ракеткасы украиналық Элина Свитолинамен сынға түседі.
Зарина Дияс пен Путинцева дәл осы турнирде жұптық сында бірге өнер көрсеткен болатын. Бірақ, олар бірінші айналымда екі сетте де қарсыластарына ұтылып қалды.
Сонымен қатар ерлер арасында жұптық сында Александр Бублик пен Андрей Голубев Мельбурнде Аустралия ашық біріншілігінің екінші айналымына өтті. Бірінші айналымда қазақстандық теннисшілер екі сетте бірдей, 7:6 есебімен жеңіске жетіп, Сальваторе Карузо (Италия) - Эмиль Руусувуори (Финляндия) дуэтінен мықты болып шықты. Бір жарым сағатқа созылған матчта екі жұп та үш рет қателік жіберді. Бублик пен Голубевтің келесі қарсыластары әлемдік рейтингте бірінші және екінші орындарда тұрған колумбиялықтар Роберт Фара мен Хуан Себастьян Кабаль.
Жұптық сында өнер көрсеткен қазақстандық Михаил Кукушкин литвалық Ричардс Беранкиспен бірге аустралиялықтар Джеймс Дакворт пен Марк Полманс дуэтінен 6: 7, 2: 6 есебімен жеңіліп, жарысты аяқтады.
Ермұхамед Мәулен
