Үкіметтің кеңейтілген отырысында премьер-министрдің орынбасары Бердібек Сапарбаев 2019 жылы "Еңбек" мемлекеттік бағдарламасы арқылы 660 мың адам жұмыспен қамтылғанын мәлімдеді.
"424 мың жаңа жұмыс орны ашылды. Оның 65%-ы тұрақты жұмыс орны. 58 мың адам микронесие мен тегін грант алды", – деді Бердібек Сапарбаев.
Оның сөзінше, былтыр еліміздегі жұмыссыздық 0,1%-ға қысқарған.
"Халыққа ыңғайлы болу үшін үкімет 83 мобильді және 54 жекеменшік жұмыс орталығын халықты жұмыспен қамтуға жұмылдырды. Нәтижесінде жұмысссыздық 2018 жылмен салыстырғанда 0,1%-ға азайды", – деді үкімет басшысының орынбасары.
Бердібек Сапарбаевтың сөзінше, еңбек нарығының талаптарына сәйкес мамандарды дайындау үшін 480 кәсіптік стандарт бекітілген.
"11 мың аз қамтылған, көпбалалы отбасыларды кәсіпкерлікпен айналысуға тарту мақсатында несиенің мөлшерлемесі 6-дан 4%-ға азайтылып, мерзімі 5 жылдан 7 жылға ұзартылды", – деді ол.
Оның айтуынша, бұдан былай кәсіптік оқу тек жұмыс берушілердің тапсырысына байланысты жүргізіледі.
"Жаһандық өзгерістерді ескере отырып 2025 жылға дейін еңбек нарығын дамытудың болжамын, жаңа кәсіп атласын әзірлеп жатырмыз", – деді Бердібек Сапарбаев.
Қанат Махамбет
