Есептеулер нәтижесі көрсеткендей, кейбір теңіз, сүт өнімдері қымбаттағанымен, көкөністердің біраз арзандауы арқасында биылғы баға алдыңғы жылғы көрсеткішпен бірдей-ақ болып шықты, деп жазады inbusiness.kz тілшісі.
Сонымен жаңа жылдық ас мәзіріне үш түрлі салат (оливье, ішік астындағы майшабақ, грек салаты), негізгі тағам ретінде манты, тіскебасарлар, жеміс-жидек пен тәтті торт кірді. Одан бөлек сусындар мен кәмпиттер алынды. Әрқайсысына жеке-жеке тоқталайық.
Негізгі тағам — мантыны даярлау үшін біздің есеппен 3 775 теңге кетеді. Қазіргі бағаларға сәйкес, 1 кг сиыр еті фаршы – 3 399 теңге, 2 жұмыртқа – 130 теңге, 500 гр ұн – 159 теңге, 300 гр пияз – 31,5 теңге, 400 гр картоп – 55,6 теңге тұрады.
Келесі кезекте тіскебасарлар. Қызыл уылдырық салынған 24 тарталетка құны – 10 699 теңге болды (уылдырық – 8595 тг, сары май – 779 тг, тарталеткалар – 1325 тг). Оған қоса үстел үстіне 1275 теңгелік шұжық пен 1500 теңгеге ірімшік қойылады. Бәрін қосқанда 13 474 теңге шығады.
Салаттарға тоқталар болсақ, бір табақ оливье салатын жасау үшін 3 779 теңгеге азық-түлік алу керек болады. Әдетте арзанға шығатын грек салаты биыл біраз қымбаттады – 3635 теңге, оған зәйтүн бағасының (314 гр үшін 1 175 теңге) өсуі себеп болған секілді. Салаттар арасында ең арзанға түсетіні – ішік астындағы майшабақ. Құрамындағы барлық ингредиенттердің жалпы құны 1 258 теңге болды.
Жеміс-жидектер бағасы бірқалыпты. Мандарин – 1 089 теңге, жүзім – 1533 теңге, алма – 778 теңге. Әр жеміс түрін 1 кг-нан алғанда барлығы 4 255 теңгеге шығады.
Сусындар ретінде балаларға – 2 л шырын (1 043 теңге) мен үдкендерге – бір бөтелке шарап (1 490 теңге) алынды. Тәтті торттың орташа бағасы 5 893 теңге болса, 1 кг кәмпит құны 2 446 теңгеге бағаланды.
Нәтижесінде "жаңа жылдық" дастарқан жаюға барлығы – 41 048 теңге жұмсау керек болады. Өткен жылы Jusan Analytics дәл осындай мәзірді негізге ала отырып, екі қала бөлінісінде есептеу жүргізген болатын.
Оған сәйкес, былтыр мерекелік дастарқан бағасы Алматыда – 40 577 теңгеге, Астанада – 39 428 теңгеге бағаланған болатын. Көріп отырғанымыздай, алдыңғы жылмен салыстырғанда дастарқан құны бар болған 620 теңгеге немесе 4%-ға ғана қымбаттаған. Ескеретін жағдай – біз ең танымал супермаркет желісіндегі бағаларды негізге алдық және есептеуде әр азық-түліктің орташа не қолжетімді бағасын қолдандық.
