Орта салмақта IBF және WBO тұжырымдары бойынша әлем чемпионы қазақстандық боксшы Жәнібек Әлімханұлы (17-0, 12 KO) WBC чемпионы Карлос Адамеспен жекпе-жек туралы келіссөздер жүріп жатқанын растады.
Жекпе-жектің өту мерзімі ретінде биылғы шілде айы қарастырылып жатыр. Бұған дейін кездесу АҚШ-тың Нью-Йорк қаласында өтуі мүмкін деген сыбыс шыққан.
Айта кетейік, Жәнібек Әлімханұлы мен Карлос Адамес биыл өз титулдарын бір реттен қорғап үлгерді.
Ақпанда доминикандық боксшы жеңіліп көрмеген британдық Хамза Ширазбен (21-0-1, 17 KO) жекпе-жекте тең түсті және белбеуін сақтап қалды. Ал Жәнібек Әлімханұлы сәуір айында Астанада өткен жекпе-жекте француз Анауэль Нгамиссенгені (14-1, 9 KO) 5-раундта нокаутқа түсірді.
Қазіргі таңда Карлос Адаместің міндетті қарсыласы бар. Ол 6 мамырға дейін қазақстандық Мейірім Нұрсұлтановпен келісімге келуі керек. Алайда, әдетте бокс ұйымдары чемпион басқа чемпионмен жекпе-жек өткізетін болса, міндетті қарсыласпен жұдырықтасу міндетті емес.
Келіссөздердің нәтижесін күтеміз.
