Іс-шараның негізгі тақырыбы 5 сәуірде Астанадағы "Барыс Аренада" өтетін француз боксшысы Анауэль Нгамиссенгеге қарсы титулдық қорғау жекпе-жегі болды.
Баспасөз конференциясында Әлімханұлы өзінің алдағы уақыттағы жоспарларымен бөлісіп, орта салмақтағы барлық белбеуді біріктіруді көздейтінін, содан кейін екінші орта салмаққа өтіп, Сауль "Канело" Альвареске қарсы (ықтимал) жекпе-жекке дайын екенін атап өтті.
Ол былай деді:
"Менің басты мақсатым – өз дивизионымда төрт белбеудің барлығын жинау. Одан кейін екінші орта салмаққа өтуді жоспарлап отырмын. Ол жерде "Канело" бар. Мен онымен айқасуға дайынмын", – деді Әлімханұлы.
Сондай-ақ, Жәнібек қарсылас іздеудегі қиындықтар туралы пікір білдіріп, бұл жағдайды Геннадий Головкиннің мансабымен салыстырды. Өйткені кезінде көптеген боксшылар онымен жекпе-жекке шығудан қашқақтаған еді.
Сонымен қатар, Әлімханұлы отандасы Мейірім Нұрсұлтановпен жекпе-жек өткізуге дайын екенін мәлімдеді. Бірақ тек Нұрсұлтанов чемпиондық белбеу жеңіп алған жағдайда ғана:
"Егер ол чемпиондық белбеу жеңіп алса, неге Қазақстанда жекпе-жек ұйымдастырмасқа?", – деп қоса кетті Жәнібек.
Айта кетейік, Жәнібектің қарсыласы Анауэль Нгамиссенге виза мәселелеріне байланысты баспасөз конференциясына қатыса алмады. Дегенмен ұйымдастырушылар жекпе-жек белгіленген күні өтетінін растады.
Осылайша, 5 сәуірге жоспарланған жекпе-жек қазақстандық бокс үшін маңызды оқиғалардың бірі болмақ. Ал Жәнібек Әлімханұлы кәсіби мансабында жаңа биіктерге ұмтылуын жалғастыруда.
Сондай-ақ, 5 сәуірде рингке Сұлтан Заурбек, Батыр Жүкембаев, ағайынды Сабырхандар – Махмұд пен Төрехан, өзбекстандық екі дүркін Олимпиада чемпионы Баходир Джалолов шығады.
