Жібек Құламбаева сонымен қатар жекелей сында финалға дейін жетті. Жібек италиялық Николь Фоссамен бірге ширек финалда жарыстың 3-ракеткалары, германиялық Наталья Седильская – босниялық Анита Хусаричті 6:2, 6:2 есебімен ұтты. Жартылай финалда турнирдің 2-ракеткалары, болгариялықтар Петья Аршинкова – Гергана Топаловадан басым түсті – 6:0, 6:3. Шешуші бәсекеде қазақстандық-италиялық жұпқа доданың 1-ракеткалары, ресейлік Элина Аванесян – румыниялық Оана Гаврила да қарсы тұрып жарытпады – 6:2, 6:3. Осылайша Ж.Құламбаева жұптық сында биылғы екінші, спорттық жолындағы сегізінші табысына қол жеткізді.
Жекелей сында финалда Жібекке сәл ғана сәттілік жетіспеді. Бұл жолы Э.Аванесянға 6:3, 4:6, 4:6 есебімен есе жіберді. Бұдан бұрын Жібек Элинаны өткен жылдың желтоқсанында дәл осы Мысырда ширек финалда ұтқан болатын – 6:3, 6:2.
Сонымен қатар қазақстандық теннисші Александр Бублик Мадридте өтіп жатқан теннис турниріне қатысып жатқан болатын. Ол Мадрид мастерс турнирін жеңіспен бастап, екінші айналымға жолдама алды. Бублик алғашқы айналымда әлемнің 39-ракеткасы, мажарстандық Мартон Фучовичпен кездесті. Тартысты өрбіген бірінші партия мәселесі тай-брейкте шешіліп, онда Бублик шеберлік танытты – 7:6 (7:5). Екінші сетте қазақстандық спортшы 3:0 есебімен алға кетті. Ақыры ол осы басымдылығынан айырылған жоқ – 6:3. Бәсеке сағат жарымға жуық уақытқа созылды. Бублик екінші айналымда әлемнің 14-ракеткасы, канадалық Денис Шаповаловпен шеберлік байқасады. Ол бастапқы кездесуінде рейтингте 37-орындағы сербиялық Душан Лайовичті 6:1, 6:3 есебімен жеңді. Тағы бір қазақстандық Михаил Кукушкин Мадрид жарысының іріктеу сайыстарынан аса алмады.
Мадридте (Испания) өтіп жатқан WTA-1000 турнирін жеңіспен бастаған тағы бір қазақстандық теннисші Елена Рыбакина үшінші айналымға өте алмады. Ол Әлемнің 16-ракеткасы Бельгия өкілі Элис Мертенстпен кездесті. Рыбакина қиынға соққан тартысты жекпе-жекте қарсыласына 6: 7 (4: 7), 5: 7 есебімен жеңіліп қалды.
Қазақстандық теннисші төрт рет қателік жіберіп, 14 брейк пойнттың бесеуін сәтті орындады. Ал қарсыласымен жеке кездесу бойынша есепті теңестірді - 1: 1.
Ермұхамед Мәулен
