27 тамыз күні орта салмақта өнер көрсететін қазақстандық боксшы Жәнібек Әлімханұлы (12-0, 8 КО) WBO (Дүниежүзілік бокс қауымдастығыи) нұсқасы бойынша ресми түрде әлем чемпионы деп танылды. Оған себеп Америкалық боксшы Деметриус Андраде (31-0, 19 КО) WBO тұжырымы бойынша орта салмақтағы титулынан бас тартып, супер орта салмаққа өтті.
Нәтижесінде, Әлімханұлы жекпе-жексіз белбеуді иеленді. Осылайша, WBO ұйымының қазақстандықты ресми түрде әлем чемпионы деп жариялаудан басқа амалы қалмады.
"Жәнібек Әлімханұлы орта салмақтағы "уақытша" чемпионнан бірден толық чемпион мәртебесіне ауыстырылды", – делінген WBO хабарламасында.
Енді толыққанды әлем чемпионы атанған Жәнібек Әлімханұлы (12-0, 8 КО) алдағы уақытқа арналған жоспарлары мен өршіл мақсаттары жайлы сөз қозғады. Сонымен Әлімханұлы америкалық Джермалл Чарломен жұдырықтасуға ниет білдірді және одан WBC белбеуін тартып алғысы келетінін мәлімдеді.
"Мен Чарломен жекпе-жек өткізіп, WBC титулын алғым келеді. Бұл оңай жұмыс болады. Егер мен жеңіл жұмыс туралы айтсам, солай болатынын бәрі біледі. Мен екі экс-әлем чемпионын нокаутқа жібердім (Роб Брэнт пен Хассан Нжикам) және осы күнге дейін жеңілмеген боксшыны (Дэнни Дигнам) жұдырықтың астына алдым. Мен әлем чемпионымын. Барлық чемпиондарды нокаутқа түсіремін! Келесі кім?", – деді Әлімханұлы Boxingscene.com. сайтына берген сұхбатында.
Естеріңізге сала кетейік, Әлімханұлы мамыр айында ұлыбританиялық Дэнни Дигнумды (14-1-1, 8 КО) екінші раундта нокаутқа түсіріп, WBO уақытша белбеуін жеңіп алған болатын.
Ермұхамед Мәулен
