3 айда Ұлттық қорға барлығы 631 млрд 445 млн 533,8 мың теңге кіріс түскен. Ал осы кезеңде қордан 1 трлн 451 млрд 271 млн 345,8 мың теңге алынған.
Оның 1,2 трлн теңге кепілдендірілген трансферт болса, 250 млрд теңге мақсаттық трансферт. Сондай-ақ, қорды басқару шығындарына 1 млрд 271 млн 345,8 мың теңге кеткен.
Жыл басында Ұлттық қордағы активтің жалпы сомасы 33 трлн 60 млрд 887 млн 543,3 мың теңге болса, 1 сәуірдегі жағдай бойынша 32 трлн 241 млрд 61 млн 731,3 мың теңгеге дейін азайған.
2024 жылдың алғашқы 3 айында да Ұлттық қордан биылғымен деңгейлес көлемде ақша алынған еді – 1 трлн 451 млрд 637 млн 857,1 мың теңге. Бірақ былтыр 3 айдың түсімі биылғыдан 50 пайызға жуық жоғары болған – 1 трлн 170 млрд 642 млн 776,5 мың теңге.
Түсімнің азайып кетуіне мұнай компанияларынан түсетін корпоративтік табыс салығының, пайдалы қазба өндіруден алынатын роялтидің, экспортқа салынатын рента салығының, өнімді бөлу келісімі бойынша алынатын үлестің азаюы себепкер болған.
