Ұлттық экономика министрі Нұрлан Байбазаров биылғы қаңтар-қыркүйек айларының қорытындысы бойынша ел экономикасы 4,0%-ға өскенін айтты, деп хабарлайды inbusiness.kz сайты.
"Биылғы қаңтар-қыркүйек айларының қорытындысы бойынша экономиканың өсуі 4,0%-ды құрады. Қабылданып жатқан шаралардың нәтижесінде үшінші ай қатарынан өсудің жеделдеуі байқалып отыр. Нақты сектордағы өсу 5,0%-ды құрады, көрсетілетін қызметтер саласындағы өндіріс 3,8%-ға артты. Биыл экономиканың өсуі толығымен шикізаттық емес сектордың дамуы есебінен қамтамасыз етілуде", - деді министр Үкімет отырысында.
Нұрлан Байбазаровтың сөзінше, ауыл шаруашылығы мен құрылыс саласы ең жоғары өсімді көрсетті.
"Көлік қызметі 8,0%-ға, байланыс 6,4%-ға, сауда 6,3%-ға, өңдеу өнеркәсібі 4,8%-ға өсті. Жалпы ішкі өнімнің өсуінің 65%-ы сауда, өңдеу өнеркәсібі, құрылыс және ауыл шаруашылығы есебінен қамтамасыз етілді. Негізгі капиталға салынған инвестициялар 0,6%-ға өсті. Инвестицияның ең жоғары өсуі шикізаттық емес салаларда байқалады. Инвестиция көлемі байланыста 81,7%-ға, білім беруде – 79,3%-ға, көлікте – 31,1%-ға, өңдеу өнеркәсібінде – 6,3%-ға, денсаулық сақтауда – 4,8%-ға өсті", - деп атап өтті ол.
Ұлттық экономика министрі үздік көрсеткіштер Алматы, Жетісу, Павлодар, Қызылорда және Түркістан облыстарында байқалатынын, Атырау, Ақмола, Ақтөбе және Маңғыстау облыстарында инвестициялар айтарлықтай төмендегенін баса айтты.
