/img/tv1.svg
RU KZ
FTSE 100 5 671,96 РТС 1 014,44
Hang Seng 23 497,47 KASE 2 224,17
DOW J 21 921,63 Алтын 1 588,80
Павлодар облысында көпқабатты 200 үй салынады

Павлодар облысында көпқабатты 200 үй салынады

Бірақ, құрылысшылар аталған жоспарды бес жылда орындап шығады дегенге сену қиын.

27 Қазан 2019 17:31 6314

Павлодар облысында көпқабатты 200 үй салынады

Автор:

Фархат Әміренов

Павлодар облысы «7-20-25» тұрғын үй бағдарламасын орындау бойынша республикада соңғы орындарға ие. Бұл туралы Үкімет отырысында бірнеше рет айтылған болатын. Биліктен сын естіп, берекесі қашты ма екен, Болат Бақауов басқаратын өңір алдағы бес жылға ауқымды жоспар құрып отыр. Яғни, алдағы бес жылда облысқа қарасты үш қалада көпқабатты 200 тұрғын үй салынбақ. Осылайша, Павлодар облысы «7-20-25» бағдарламасын орындаудағы олқы тұсын толтыруға ниетті. Сонымен қатар, әкімшілік облысқа көшіп келушілерге жақсы жағдай жасауға ықыласты.

«Бес жыл ішінде Павлодар қаласында көпқабатты 100 үй, Екібастұзда 50 үй және Ақсуда 50 үй салынады деп күтілуде. Одан бөлек, шамамен 2 мың жеке тұрғын үй тұрғызылады. Қазіргі уақытта Екібастұз және Ақсу қалаларында құрылыс жұмыстары басталды. Жергілікті және елордалық компаниялар құрылыс жұмыстарымен айналысуда», – деді Павлодар облыстық құрылыс басқармасының басшысы Рүстем Раисов.

Оның айтуынша, алғашқы үйлер келер жылдың наурыз айында пайдалануға берілмек. Ал Павлодар қаласындағы көпқабатты үйлердің құрылысы 2020 жылы басталады.

«2020 жылы 10,9 млрд теңгеге 19 тұрғын үй салынады деп күтілуде. Оның 8,1 млрд теңгесі республикалық бюджеттен, 2,8 млрд теңгесі облыстық қазынадан бөлінеді. Бөлінген қаржыға Павлодардың «Достық» шағын ауданында 2 үй, Екібастұздағы №22 шағын ауданда 10 және Ақсу қаласындағы №4 ауданда 7 көпқабатты үй пайда болады. Бұл дегеніңіз – 1100 пәтер», – дейді басқарма басшысы.

Пайдалануға берілетін үйлер «Nurly Ertis» бағдарламасы аясында Павлодар облысына көшіп келетін тұрғындарға беріледі. Биыл аталған бағдарлама аясында Екібастұз қаласына 2 мыңнан астам адам көшіп келді. Ал 2020 жылы облысқа 6 мың адам қоныс аударады деп күтілуде.

Еске сала кетейік, Павлодар облысында 25 мың бос жұмыс орны бар. Оның 10 мыңы – тұрақты жұмыс орны. Аталған мәселені шешу мақсатында облыста «Nurly Ertis» бағдарламасы қолға алынған болатын.

«Екібастұз, Ақсу қалаларының білім беру мекемелерінің басым бөлігінде бос орындар көп. Оның үстіне облыстан көшіп кетіп жатқандардың қарасы қалың. Осыны ескере отырып, жұмыс күші көп оңтүстік өңірдің тұрғындарын, елордалықтарды Павлодар облысына шақырып отырмыз. Арнайы шақырған соң, оларды баспанамен міндетті түрде қамтуымыз керек. Мәселен, биыл Екібастұздағы көпқабатты 4 тұрғын үй облысқа қоныс аударушыларға берілді», – деп нақтылады Рүстем Раисов.

Белгілі болғандай, «Nurly Ertis» бағдарламасы аясында көшіп келушілерге көпқабатты тұрғын үйлер ғана емес, жеке үйлер де берілетін болыпты. Бұл ретте, Екібастұзда 1 мың гектар жер телімі құрылыс жүргізуге дайындалған.

«Мұнда қажетті инженерлік желілер тартылды. Қазіргі уақытта орталықтандырылған жылу желісі жүргізілуде. Павлодар қаласына қарасты Ленин кентінде де 1 мың гектардан астам жер теліміне инфрақұрылым тарту мәселесі қарастырылуда. Ақсу қаласында бұл бағыттағы жұмыстар аяқталды. Мұнда келесі жылы бірдей типтегі 60 үй салынады. Жалпы, жеке үйлердің құрылысы тек «Nurly Ertis» бойынша емес, «Нұрлы жер» мемлекеттік бағдарламасы бойынша да жүргізіледі. Соның нәтижесінде облыс аумағындағы тұрғын үй қоры айтарлықтай көбейеді», – дейді құрылыс басқармасының басшысы.

Еске сала кетейік, соңғы үш жылда Павлодар облысында 711 мың шаршы метр тұрғын үй пайдалануға берілген. Биыл 300 шаршы метрді іске қосу жоспарланған. 

Фархат Әміренов

inbusiness.kz-ті қараңыз, оқыңыз :

9 мың жас азамат жалға берілетін тұрғын үй алады

ТМД елдері арасында Қазақстанда ең көп баспана салынған.  

28 Ақпан 2020 19:56 1939

9 мың жас азамат жалға берілетін тұрғын үй алады

Индустрия және инфрақұрылымдық даму министрлігінің Құрылыс және тұрғын үй-коммуналдық шаруашылық істері комитетінің төрағасы Мархабат Жайымбетов еліміз тұрғын үй салу бойынша ТМД елдері арасындағы ең жоғары көрсеткішке ие екенін мәлім етті.

Мархабат Жайымбетовтың айтуынша, тұрғын үйді пайдалануға беру көрсеткіші бойынша еліміз Тәуелсіз мемлекеттер достастығы елдері арасында ең жоғары көрсеткішке қол жеткізген. 18,3 млн адам бар елімізде бір тұрғынға баспана беруі – 0,71 шаршы метр. Ресейде – 0,54 ш.м., Белоруссия – 0,40 ш. м., Өзбекстан – 0,36 ш. м.

Мархабат Жайымбетов халықтың әлеуметтік осал топтарының тұрғын үй мәселесі ерекше бақылауда тұрғанын айтты.

«Мемлекет басшысының тапсырмасы бойынша үш жыл ішінде әсіресе аз қамтылған көпбалалы отбасыларды баспанамен қамтамасыз етуді жоспарлап отырмыз. Бұл үшін тұрғын үй заңдарына заңнамалық түзетулер енгізілді және «Нұрлы жер» бағдарламасы арқылы қаржыландыру тетіктері көзделген. Осы санаттағы 40 мыңнан астам кезекте тұрғандардың ішінде 2019 жылы түрлі тетіктер арқылы 7 387 отбасы тұрғын үймен қамтамасыз етілді», – деді комитет төрағасы.

Баспана беруде жастарға да көңіл бөлінуде.

«Елбасы жариялаған Жастар жылы аясында Нұр-Сұлтан, Алматы және Шымкент қалаларында жұмыс істеп жатқан жастардың тұрғын үй мәселесін шешу шаралары қабылданды. 2019-2021 жылдары жастардың 9 мың азаматын жалға берілетін тұрғын үймен қамтамасыз ету көзделіп отыр, 5 жылдық кезеңде осындай пәтерлерде тұрып, тұрғын үй құрылыс жинақ жүйесі бойынша өз тұрғын үйіне қаражат жинауға міндетті. 2019 жылы мұндай баспана 3004 қатысушыға берілді», – деді Мархабат Жайымбетов.

Нұржан Көшкін

 

Павлодарда қанша шаршы метр үй салынады?

Құрылысқа негізінен жергілікті кәсіпорындардың материалын пайдалану көзделіп отыр. 

23 Қаңтар 2020 20:30 3744

Павлодарда қанша шаршы метр үй салынады?

Осы жылы Павлодар облысында 420 мың шаршы метр тұрғын үй салынбақ. Көрсеткіш 2019 жылмен салыстырғанда әлдеқайда жоғары. Былтыр өңір бойынша 332,7 мың шаршы метр тұрғын үй пайдалануға берілген болатын.

«Жалпы, тұрғын үй құрылысы қарқын алып келеді. Былтырғы жылдың көрсеткіші 2018 жылмен салыстырғанда 17 пайызға жоғары болды. Осыдан үш жыл бұрын өңірде небары 165 мың шаршы метр тұрғын үй ғана салынғанын ескерсек, саладағы оң динамиканы байқау қиын емес. 2021 жылы көрсеткіш 500 мың шаршы метрге жетеді деп күтілуде», – деді Павлодар облыстық құрылыс басқармасының басшысы Рүстем Раисов.

Десе де, өзге өңірлермен салыстырғанда Павлодар облысының жеке тұрғын үй құрылысы және саладағы жеке инвестиция бағытындағы үлесі тым төмен екенін атап өткен жөн.

«2019 жылдың қорытындысы бойынша өңірдегі құрылыс жұмыстарының көлемі 206,8 млрд теңгені құрады. Бұл көрсеткіш 2018 жылмен салыстырғанда айтарлықтай жақсы. Былтыр тұрғын үй құрылысының 60 пайызы бюджеттен қаржыландырылды. Жалпы, өткен жылы тұрғын үйлер мен әлеуметтік нысандарды салуға барлық бюджет көздерінен 45,3 млрд теңге бөлінді», – деді Рүстем Раисов.

Деректерге сүйенсек, алдағы үш жылда Павлодар облысы бойынша құрылыс жұмыстарына 70 млн кірпіш, 60 мың текше метр бетон, 21 текше метр іргетас пен тақтатас, 400 шақырым құбыр, 100 шақырым кабель, 30 мың шаршы метр есік пен терезе керек екен. Бұдан бөлек, қиыршық тас, құм, сантехникалық жабдықтар және басқа да материалдар қажет. Бұл ретте, жергілікті өндірушілердің құрылыс материалдарына басымдық берілмек.

Биыл ерекше сұранысқа ие болатын материалдардың қатарында құбыр да бар. Тұрғын үй құрылысына шамамен 400 шақырымдық құбыр қажет. Сондай-ақ, биыл ауылдарға ауызсу тартуға тағы 700 шақырымдық құбыр керек. Яғни, павлодарлық құбыр шығаратын кәсіпорындардың жұмысын дамытуға негіз боларлық ауқым бар. Аймағымызда мұндай өнімді өндіретін бірнеше кәсіпорын жұмыс істейді. Солардың бірі осыдан біршама жыл бұрын ашылған «ДАНиЕР» жауапкершілігі шектеулі серіктестігі.

«Көбінесе тапсырыспен жұмыс істейміз. Өнім Қазақстан аумағына және Ресейдің бізбен шекаралас облыстарына экспортталады. Облыста да қолданып жатқандар жетерлік. Бастысы, шығаратын тауарымыздың сапасына мән береміз. Беделімізді түсірмес үшін әр құбырдың сапалы жасалынуы қадағаланады. Құбырларға 50 жылға кепілдік беріледі», – деді «ДАНиЕР» жауапкершілігі шектеулі серіктестігі директорының орынбасары Әлішер Тұтылқұлов.

Бұл кәсіпорын 2009 жылы құрылған болатын. Полиэтилен, тік тігісті болат құбырлар шығарады. Жылына 20 мың тонна полиэтилен құбырларын өндіруге қауқарлы. Яғни, диаметрі 20 мм-ден 1000 мм-ге дейінгі полиэтилен құбырлары шығарылады. Сонымен қатар, диаметрі 40 мм-ден 325 мм-ге дейінгі тік тігісті болат құбырларын да өндіреді. Құбырдың мұндай түрлерінің жылына 30 мың тоннасын жасай алады.

Фархат Әміренов

inbusiness.kz-ті қараңыз, оқыңыз :

Жаңалықтарға жазылу: