Жақында ғана «Қорқыт ата» әуежайынан Түркия еліне рейс ашылды. 

Осы күні жұмысы толық бітіп, жақында ел игілігіне табысталатын жобаның құны – 15 миллиард 700 миллион теңге, деп хабарлайды inbusiness.kz тілшісі.

Әуежай терминалының құрылысы өткен жылдың ақпан айында басталған-ды. 

Айта кетейік, «Болат Өтемұратов» қорының қаржылай қолдауымен жаңаланған терминалда 2 эскалатор мен 2 лифт және бірқатар бөлме қарастырылған. 

Әуежай құрылысына әртүрлі жоғары сападағы қымбат әрі сәнді материалдар пайдаланылған. Мысалы, лифт, эскалатор сынды заттар Финляндия елінен әкелінсе, багаж жүйесінде франциялық үлгінің қолтаңбасы бар. Сондай-ақ, телетрапты Испаниядан алдырған.

Қазіргі әуежай сағатына 150 жолаушыны қабылдаса, жаңа терминал іске қосылғаннан кейін 250 жолаушыға қызмет көрсете алады. Бұған дейін «Қорқыт ата» әуежайының басқарма төрағасы Баян Әжмолдаев аталған нысанның барлық талапқа сай, заманауи үлгіге лайық екендігін айтқан болатын.

Әуежай соңғы 4 айда жолаушыларға қызмет көрсету бойынша жақсы нәтижелерге қол жеткізген. Мысалы, биылғы жылдың 4 айында 105 мыңнан аса жолаушыға қызмет көрсеткен.

Яғни, жаңа терминал пайдалануға берілгенде жолаушылар тасымалы жылына 130 мыңнан 200 мың жолаушыға, жүк тасымалы 150 тонадан 240 тоннаға дейін артады деп күтілуде. Құрылыс жұмыстары аяқталғаннан кейін 40-45 жаңа жұмыс орны да құрылмақ.