ШЫҰ мүше-мемлекеттерінің қауіпсіздік кеңесі хатшыларының 12-кездесуі өтті
Қазақстанның Шанхай ынтымақтастық ұйымында төрағалық етуі аясында 2017 жылдың 6 сәуірінде Астанада ШЫҰ мүше-мемлекеттерінің қауіпсіздік кеңесі хатшыларының 12-кездесуі өтті. Отырыс барысында алдағы уақытта Ұйымның кеңейтілуіне байланысты мүше-мемлекеттердің өзара қарым-қатынас механизмдерін жетілдіру, аймақтағы қауіпсіздік пен тұрақтылық саласындағы жағдай туралы пікір алмасу өтті. Кездесуге қатысушылар қазіргі заманның қауіп-қатерлері мен сын-тегеуріндеріне қарсы тұруда ынтымақтастықты одан әрі дамыту мәселелерін талқылады. Тараптар ШЫҰ мүше-мемлекеттерінің құзырлы органдары ланкестік, сепаратизм мен экстремизм, трансұлттық және ұйымдасқан қылмыс, заңсыз көшіп-қону, қару мен есірткі заттарының заңсыз айналымына қарсы іс-қимыл бойынша бір-бірімен тығыз байланысын дамыту туралы келісімге келді. Отырыс барысында аймақта бейбітшілік пен тұрақтылықты орнатуға бағытталған ШЫҰ қызметіне бақылаушы мемлекеттер мен серіктестерді тарту мәселесінің өзектілігі баса айтылды. Кездесуге қатысушылар 2017 жылдың 1 қаңтарынан бастап БҰҰ Қауіпсіздік кеңесінің тұрақты емес мүшесі ретінде жұмыс істеп жатқан Қазақстанның еңбегін ерекше атап өтті және Қазақстан тарапы жаһандық бейбітшілік пен қауіпсіздікті нығайтуға өз үлесін қостынына сенімін білдірді.
