Енді, ақылы жолда да ақырын жүрмесеңіз айыппұл арқалауыңыз мүмкін. Индустрия және инфрақұрылымдық даму министрлігі республикалық және халықаралық маңызды жолдарға да әр 60 шақырым сайын бейнебақылау камераларын орнатпақ. Жобаны жүзеге асыру үшін Қазавтожол қазақстандық-тайвандық компаниямен 26 миллиард теңгеге келісім жасасқан. Бүгінде кез-келген көліктің орташа жылдамдығын анықтауға мүмкіндік беретін жүйеге қажеттілік жоғары. Себебі, еліміздегі жолдардың сапасы артқан сайын жол-көлік апаттары да көбейген. Мәселен, өткен жылы жол бойында 2547 жол-көлік апаты болған. Бұл 2018 жылмен салыстырғанда 18%-ға көп. Ал, апаттардың 33,6%-на жылдамдықты арттыру себеп. Өткен жылы жолдарды қайта жөндеу мен қалыпта ұстап тұруға 470 миллиард теңге кеткен.
