Құмар ойындары нарығындағылар көлеңкелі бизнеске көшуді бастады. Сарапшылардың пікірінше бұған салаға қатысты салық ставкасының өсуі себеп болған. Биылдан бастап ойын бизнесіне салынатын салық көршілес Ресеймен салыстырғанда он есеге артық. Осыған байланысты соңғы уақытта заңды жұмыс істеп келген мекемелердің жабылуы жиілепті. Мемлекеттік кірістер комитетінің дерегіне сүйенсек жыл басынан ойын бизнесінен түскен салық та 28,7 пайызға азайып отыр. Яғни, өткен жылғы кірістін кем дегенде төрттен бірі жоқ. Аталмыш нарықтағы компаниялардың да жағдайлары мәз емес. Олардың тоғыз айдағы табысы өткен жылмен салыстырғанда екі есеге азайып, жалпы соммасы 9,7 млрд теңге ғана тапқан. Бұл сомманың 74 пайызы казино мен букмекерлік кеңселерге бай Алматы облысына тиесілі. Ал, Қостанай, Павлодар, Солтүстік Қазақстан және Түркістан облыстары бұл салада тақыр тиын да таппаған. Сондай-ақ жыл басынан ойын бизнесіне үстеме құн салығын төлеу де міндеттелген болатын. Букмекерлік бірлестіктер тауар құнын көтеріп сататындарға арналған салықтың бәс тігумен шұғылданатындарға қолдану мүлдем орынсыз деп отыр.
