Шымкенттегі тұрғын үйлердің бірінен жанар-жағар майды қолдан жасайтын жасырын цех анықталды. Экономикалық тергеу департаментінің қызметкерлері жекеменшік үйді тексеру кезінде мұнай өнімдерін араластыратын құрал-жабдықтарды тапқан. Белгілі болғандай, үш тұрғын бірігіп осы цехтың жұмысын жүргізіп келіпті. Олар қаңтар айынан бері жағар майды арзан пеш майымен араластырып, үлкен көлемде сапасыз дизель отынын шығарып отырған.