Коронавирус Қазақстанға күні ертең келеді. Үрейді ұшыратын мұндай мәлімдемені еліміздің Бас санитар дәрігері жасады. Сөйтсе, бұл ғалымдардың математикалық моделі арқылы шыққан болжам екен. Десе де, «жан-жақтан жалмап жатқанда, дерт Қазақстанды айналып өтуі мүмкін емес»,- дейді мамандар. Сондықтан дәрігерлер сақадай-сай отыр. Алыста жүрсе де, коронавирус Қазақстанның қазынасын да қақпай қоймады. Тіпті, Қаржы министрі: «жоспарымызды күл-талқан етті»,- деп шағымданды. Есіктен сығалап, табалдырықты аттағалы тұрған коронавирустың қалай елімізге енетінін әріптесім Арай Сүгірбай біледі.