Inbusiness.kz теңгенің долларға, еуроға және рубльға қатысты бағамына арналған кезекті апталық валюта болжамын оқырман назарына ұсынады. 

( 23 қараша – 28 қараша) 

Сыртқы саяси-экономикалық факторлар теңге бағамына әдеттегідей әсер етуде. Inbusiness.kz басылымында өз болжамдарымен бөліскен сарапшылардың назарында осы жолы доллар бағамы, АҚШ-тағы саяси ахуал, мұнай бағасы пен ОПЕК+ отырысы болды. 

Сарапшылардың толық пікірін сайт әзірлеген кезекті сауалнамадан оқи аласыздар:

Анна Бодрова, «Альпари» бас аналитигі:
KASE биржасында теңгенің негізгі валюталарға қатысты бағамы нығайды. Бұған мұнайдың қымбаттауы мен инвесторлардың қатерлерге деген көзқарасы әсер етіп отыр. Олар коронавирус дертіне қарсы вакцина тиімділігі тағы да жоғарылап, індеттің таралуы бәсеңдейді деген пікірде. АҚШ долларының әлемдік нарық капиталындағы позициясы әзірге әлсіз. Дегенмен қазір бұл қалыпты жағдай болып саналады. Менің болжамым бойынша, бір доллар 422-425 теңге, бір еуро 495-510 теңге, бір юань 64-66 теңге, бір рубль 5,50-5,65 теңге болады.

Андрей Маслов, «Финам» КТ сарапшысы:
Өткен аптада теңгенің долларға қатысты бағамы нығайды. Нарық динамикасына Pfizer мен BioNTech компанияларының вакцинасы туралы жаңалық оң әсерін берді. Тәуекел активтеріне деген сұраныс та артты. Вакцинаға қатысты мәліметтер жарияланғаннан соң, мұнай бағасы көтеріліп, шикізатқа тәуелді елдердің валютасы нығайды. 30 қараша мен 1 желтоқсанда ОПЕК+ кездесуі өтеді, осыдан кейін мұнай нарығының қай бағытта дамитыны белгілі болады. Қазақстан Ұлттық Банкінің уақытылы қабылдаған шаралары елдегі іскерлік белсенділіктің қалыпқа келуіне әсер етті. Іскерлік белсенділік индексі ақпан айынан бері 48,8 пунктке дейін көтерілді. Алдағы аптада бір доллар 422-427 теңге, бір еуро 505-508 теңге, бір рубль 5,30-5,70 теңге, бір юань 64,00-64,70 теңге шамасында болады деп ойлаймыз.

Айдар Қалиасқар, Forex Club қаржы скауты:
 Өткен аптаның соңындағы сауда қорытындысы бойынша теңгенің негізгі валюталарға қатысты бағамы әлсіреді. Мұнай нарығындағы жағдай валюта нарығына кері әсерін тигізіп отыр. Инвесторлар назары Pfizer мен BioNTech, AstraZeneca компаниялары жасаған вакциналарда. Қазір індет әлемнің бірқатар елінде дендеп барады, жағдай тұрақсызданып жатыр. 1 желтоқсанда ОПЕК+ елдері кездесу өткізгеннен кейін, мұнай нарығының алдағы уақытта қандай көрсеткіштерге ие болатыны анықталады. Біздің ойымызша, алдағы аптада бір доллар 423-426 теңге, бір еуро 504-507 теңге, бір рубль 5,6-5,9 теңге, бір юань 64,5-64,8 теңге болады