Бұл туралы Оқу-ағарту министрлігінің Орта білім беру комитетінің төрағасы Қаныбек Жұмашев Орталық коммуникациялар қызметіндегі брифингте мәлімдеді, деп жазады inbusiness.kz сайты.
Биыл 9-сыныпты 364 мыңнан астам оқушы аяқтап, 10-сыныпта оқуын жалғастыру немесе колледжге түсу жөнінде шешім қабылдайды. Ал 217 мыңнан астам түлек 11-сыныпты бітіреді.
Оқу жылы 25 мамырда аяқталады. 1-10 сынып оқушылары үшін соңғы оқу күні 23 мамыр болып белгіленіп, "Білімім – отаныма" атты бірыңғай сынып сағаты өткізіледі. 11-сынып оқушылары үшін мектеппен қоштасу салтанаты 23 немесе 24 мамырда ұйымдастырылады.
Қорытынды мемлекеттік емтихандар:
-
9-сыныптар: 29 мамыр – 10 маусым аралығы;
-
11-сыныптар: 30 мамыр – 16 маусым аралығы.
2023 жылдан бастап еліміздегі барлық мектептерде оқыту тіліне қарамастан қазақ тілі мен әдебиетінен аралық емтихан өткізу енгізілген. Биыл бұл емтиханды 5, 6, 7, 8 және 10-сынып оқушылары 27-31 мамыр аралығында тапсырады. Жалпы саны – 1,7 миллионнан астам оқушы.
Емтихан CREF халықаралық стандартына сай 4 бағытта өтеді: тыңдалым, айтылым, оқылым және жазылым. Бұл – оқушылардың мемлекеттік тілді меңгеру деңгейін бағалап, тілдік дағдыларын дамытуға арналған қадам.
Түлектерге аттестат табыстау салтанаты 18-20 маусым аралығында өтеді.
