Ташкентте өткен информатикадан халықаралық олимпиадада жүлде алған қазақстандық оқушылар елордаға оралды, деп хабарлайды inbusiness.kz сайты.
Астана әуежайында жас чемпиондарды Оқу-ағарту министрі Жұлдыз Сүлейменова, "Дарын" республикалық ғылыми-практикалық орталығының өкілдері, ата-аналары, ұстаздары мен достары қарсы алды.
IOI 2026 қорытындысы бойынша Қазақстан құрамасының төрт мүшесі де жүлдегер атанды. Олар 1 алтын және 3 күміс медаль жеңіп алды. Қазақстан командалық есепте 10-орынға ие болды. Бұл – еліміздің олимпиадаға қатысу тарихындағы үздік нәтижелерінің бірі.
Максим Цой алтын медаль жеңіп алып, жеке есепте 5-орынға тұрақтады. Мансур Мамадахунов, Асқар Әкежан және Алдияр Сейтбай күміс медаль иеленді.
Қазақстан құрамасына Темірлан Сатылханов пен Айбек Қуанышбай жетекшілік етті.
