Мониторинг барысында республика бойынша мектептердің 99%-ы, яғни 7 121 мектеп қамтылған, деп хабарлайды inbusiness.kz сайты.
Осылайша, Қазақстандағы мектептердің жаңа оқу жылына дайындығын бақылау барысында 2 087 асханада санитариялық-эпидемиологиялық талаптардың бұзылғаны белгілі болды.
Комитет төрағасы білім беру ұйымдарының жаңа оқу жылына дайындығына қатысты жаппай тексерістің маусым айында ғана жүргізілгенін еске салды.
Оның сөзінше, 6 338 мектеп асханасының, 6 256 медициналық пункттің және 262 мектеп-интернаттың жағдайы терең зерделенген.
– Оның ішінде 1 168 мектеп пен 45 мектеп-интернаттың асханасында санитариялық-техникалық жағдай талапқа сай емес. Сондай-ақ, технологиялық және тоңазытқыш жабдықтар жеткіліксіз, – деді Сархат Бейсенова.
Мұндай кемшіліктің ең көп Түркістан облысында (259) анықталған. Қарағанды облысында – 163, Алматы қаласында – 123, Қызылорда облысында 115 жағдай тіркелген.
Комитет төрағасы анықталған кемшіліктердің бір бөлігін білім беру ұйымдары жаңа оқу жылына дайындық барысында өз күшімен жоя алатынын айтты. Оған қомақты қаржы бөлу керек емес.
– Дегенімен, қаржы бөлуді қажет ететін мәселелер де бар. Олардың қатарында инженерлік желілерді, шатырларды, желдету, жылыту және сумен жабдықтау жүйелерін жөндеу бар. Мұнан бөлек, асханалар мен медициналық пункттерді жөндеп, қажетті құрал-жабдықтармен қамтамасыз ету қажет, – деп сөзін қорытындылады ол.
