Тараз-Сарыкемер тас жолының бойында газ құбырлары тартылып, құрылыс жұмыстары жүріп жатқан. Белгісіз біреулер құны 3 миллион теңгеден асатын газ құбырларын ұрлап кетті, деп жазады inbusiness.kz
Полиэтилен құбырларының ұрланғаны туралы арыз Байзақ аудандық полиция басқармасына түскен. Құрылыстың мердігер компанияларының бірі белгісіз тұлғалар Тараз-Сарыкемер тас жолының бойында газ құбырлары жүргізіліп жатқан құрылыс орнынан мекемеге тиесілі жеті полиэтилен құбырды ұрлап кеткенін хабарлаған. Келтірілген жалпы шығын көлемі 3 185 000 теңгені құрайды.
Жүргізілген жедел-іздестіру жұмыстарының нәтижесінде ұрлыққа қатысы бар Т. Рысқұлов ауданының 43 және 33 жастағы тұрғындары ұсталып, полиция бөліміне жеткізілді.
Күдіктілер кінәсын толық мойындап отыр. Қазір осы дерекке қатысты Қылмыстық кодекстің 188-бабы 3-бөлігі 1-тармағына сәйкес сотқа дейінгі тергеу амалдары жүргізілуде.
