Мұғалжар ауданының Сағашилі ауылы маңында "Lada Largus" және "Toyota Hilux" көліктері соқтығысты. Жеңіл көліктің жүргізушісі мен жолаушылары түгелдей жанып кетті. Қаза тапқандардың төртеуі – бала. Екінші көлікте болған ерлі-зайыпты мен олардың 15 жастағы ұлы кеше аудандық ауруханаға жеткізіліп, алғашқы медициналық көмек көрсетілген болатын. Кейін олар облыс орталығына жеткізілді. Жағдайлары қалыпты.
"Жол апатынан жарақат алған 1974-інші жылғы ер адам мен 1981-інші жылы туған әйел Облыстық көпсалалы облыстық ауруханаға жеткізілді. Екеуі де бастарынан жарақат алған, милары шайқалған. Ер азаматтың иығы, ал әйелдің оң жақ бұғанасы сынған. Ота жасауға дайындап жатырмыз", - деді Ақтөбе облыстық көпсалалы ауруханасының дәрігер-травматологы Жасұлан Орымбаев.
Бұл оқиғаға қатысты қылмыстық іс қозғалды. Әзірге апатқа нақты қай көліктің жүргізушісі кінәлі екені белгісіз. Ол сараптама жұмыстарынан кейін ғана анықталады.
