Абай облысының құтқарушылары қар құрсауында қалған адамдарға көмектесті, деп жазады inbusiness.kz ТЖМ баспасөз қызметіне сілтеме жасап.
15 қаңтар күні таңғы уақытта "112" пультіне Сұлусары ауылы аумағында Өскемен-Алматы тас жолында бірнеше көлік қар құрсауында қалғаны туралы хабарлама келіп түсті. 6 адам, оның ішінде 4 бала эвакуациялауды қажет еткен.
"Оқиға орнына №14 өрт сөндіру бөлімі жеке құрамынан 3 адам және өтімділігі жоғары "КУНГ" техникасымен жіберілді. Жол бойында қар құрсауында қалған жеңіл көліктерден 7 адам құтқарылды, оның ішінде 2 бала бар", - делінген хабарламада.
Ақпаратқа сәйкес, құтқарылғандарға медициналық көмек қажет болмаған.
Қалбатау ауылына келгеннен кейін адамдар "Арнау" қонақ үйіне орналастырылды, деп хабарлады ведомствоның баспасөз қызметі.
