Түркістан облысының тұрғыны бір күнде қос перзентінен айырылып қалды, деп хабарлайды inbusiness.kz сайты "Информбюро" бағдарламасына сілтеме жасап.
Бұған дейін Еңбекші ауылындағы Ошақты каналына бір үйдің екі баласы ағып кеткенін жазған едік.
БАҚ-тың хабарлауынша, қайғылы оқиға болар күні балалардың анасы жұмысқа таң атпай кеткен. Артынша күйеуі де нәпақа табуға шыққан. Балаларға үйдің үлкен қызы бас-көз болған.
"Маған қиын, бір күнде екі баладан айырылдым. Бір күнде екі табыт шығару... Ондай деп ойламаған едім. Жеті баламды қуанып өсірген едім. (…) Мен бір ұлым деп ойладым. Жұмыстан жүгіріп келіп, каналдың жанында ойбайлап жүгіріп жүр едім. Әкімшіліктен Дәурен деген бала келіп, сабыр етіңіз дегенде алтыншы балам Юсуфахметтен де айрылып қалдық деді. Ағасы інісін құтқарамын деген ғой. Інісінің мойнынан құшақтап алып, сол күйі кетіп қалған. Кеше інісін тапты. Сол күні ағасын тапты. Талабым – каналды қоршап, жапсын", – деді балалардың анасы Айгүл Тамашева.
