Ақмола облысының Бұланды ауданында Индустрияландыру картасы аясында еліміздегі және Орталық Азиядағы ең ірі құс фабрикасының құрылысы жүргізіліп жатыр, деп хабарлайды "ҚазАқпарат".
"Макин құс фабрикасы" ЖШС-нің директоры Алексей Шевченконың айтуынша, тірі салмақтағы жылдық қуаты 60000 тоннаны құрайтын болашақ құс фабрикасы 2015-2019 жылдар аралығында екі кезеңмен салынып бітпек. Жоба құны – 43 миллиард теңге шамасында.
"Құс фабрикасы салынып біткен соң 700 тұрақты жұмыс орны ашылады. Сондай-ақ, жобаның арқасында Бұланды ауданының қуат көздерімен және сумен жабдықтау жүйелері дамып, өңірде шағын және орта бизнестің дамуына септігі тиеді. Жоба желілік құрылыс кестесіне сай, алдымен инкубатор пайдалануға беріліп, әрқайсысында 6 тауық қораны біріктіретін 8 алаңқай, құс етін және қалдықтарды өңдейтін зауыт пен бөлім салынып, экологиялық және технологиялық қондырғылар орнатылады", – дейді А.Шевченко.
