Ақтөбе облысында жалпы құны 148 млрд теңге тұратын тау-кен металлургия зауыты іске қосылады. Бұл туралы өңірдің индустриалды-инновациалық даму басқармасы хабарлады.
Комбинат Мұғалжар ауданының "Юбилейное" кен орнында салынуда.
"Жоба құны шамамен 148 млрд теңге. Бүгінде оның 5 млрд теңгесі игерілген. Комбинат жылына 5 млн тонна құрамында алтын бар кен өндіреді деп жоспарлануда. Зауыт 2022-2023 жылдары толық жұмыс істей бастайды",– деді басқармада.
Қазіргі кезде комбинаттың техника-экономикалық негіздемесі мен жобалық-сметалық құжаттары дайын. Сонымен қатар, зауыттың ішкі құрылымы бойынша жобалық жұмыстар мен инженерлік-геологиялық ізденістер жүргізілуде. Кәсіпорын іске қосылған соң 700 адам жұмыспен қамтылады деп жоспарлануда.
Бұған дейін комбинат 2020 жылы жұмыс істей бастайды деп хабарланған болатын.
